Nakuusertoqarnerata AWG takussunarsarpaa

Pilo Samuelsenip erneranut 16-inik ukiulimmut South Slavemi Arctic Winter Gamesimut peqataanera nuanninngitsupilussuarmik naammassivoq. 16-inik ukiulik Dene Gamesimut peqataavoq. Taanna peqquteqannginnguatsiartumik allamiumit peqaataasumit saassunneqarpoq. Saassussineq sisamanngornermi unnukkut unammisoqarnerani pivoq.

- Ernera allanik oqaloqateqarnermini tassanngaannaq kivinneqariasaarpoq, nunamullu igeriunneqarluni, Pilo Samuelsen Sermitsiaq.AG-mut ilisimatitsivoq.

Peqquteqanngitsumik saassussineq

Igeriunneqarnera sakkortungaarmat nukappiaraq passimmigut ajoquserpoq, taanna napisimagunarpoq.

- Saassussineq ernerma tupassutigisorujussuuaa. Angutip peqilluni qulangersimagaani eqqaamavaa, allanillu unitsinneqarsimanngikkuni saassussiinnarsimassagaluartoq qularuteqanngilaq, Pilo Samuelsen oqaluttuarpoq.

Pilo Samuelsenip ernera sungiusaasumini ajoqusersimasut nakorsiartarfiliaanneqarpoq. Tarrarsortippoq, kisianni passimmigut napisimanersoq qularnaatsumik oqaatigineqarsinnaasimanngilaq. Unnuakkut pingasunut angerlarpoq. Aqaguani ullaakkut tamanna pisoq politiinut nalunaarutiginiarlugu aalajangiuppaat. Saassussisoq angutaavoq 22-nik ukiulik Alberta Northimeersoq, angisuutut nukittuutullu oqaatigineqartoq.

Ujaminnatsitsinermi peqataasoq

Aqaguanilu aamma Pilo Samuelsenip saassussineq pillugu tusagaqarpoq. Taassuma kalaallit AWG-mi nunani tamalaani komitéanut ilaasortaq attaveqarfigaa, taassuma qanoq pisoqarsimanera tusarlugu ajuusaarutigaa.

- Pineqartoq ilaajunnaartitaalluni peersinneqarnissaa naatsorsuutigalugu oqarpunga, Pilo Samuelsen oqarpoq.

Kisianni unnummi tassani tamanna pisimanngitsoq paasinarsivoq. Ujaminnatsitsinermut atatillugu 22-nik ukiulik Pilo Samuelsenip ernera sanioqquppaa.

- Ersisorujussuuvoq, kisianni qujanartumik susoqanngilaq.

Sungiusaasumit nakkutigineqartoq

Piko Samuelsenip tamanna tusaramiuk, saassussisup suli peqataatinneqarnera maalaarutigalugu AWG-p nunani tamalaani komitéanut allappoq.

Kingusinnerusukkullu aamma 22-nik ukiullip ilaanut allappoq. Tassani angutip AWG-ertoqarnerata sinnerani sungiusaasumit nakkutigineqarnissaa aalajangiunneqarsimasoq akissutigineqarpoq, ujaminnatsitsinermullu peqataaneranut tamanna aamma pissutaanerarpaat. Unamminermulli peqataajunnaartinneqarsimavoq.

- Peqataaneranut aalajangiisoqarsimasoq paasigakku aatsaat iluamik kamalerpunga. Isumaga malillugu AWG-p pingaartitaanut aamma Dene Gamesip pingaartitaanut naapertuutinngilluinnarpoq, Pilo Samuelsen oqarpoq.

- Tulluartumik iliortoqartoq

Kisianni malittarisassat malinneqartut, AWG-mit oqariartuutigineqarpoq.

- Pisut taamaattut tamarmik ajuusaarnarluinnartuupput, kisianni Team Greenland, Host Society aamma AWG International Commitee (IC) uani suliami tulluartumik iliorsimasut paasivara, AWG IC-mi præsident, Jens Brinch, Sermitsiaq.AG-mut taama oqarpoq.

- Angut Team Alberta Northimeersoq ilaminitAWG-p sinnerani peqataasussaajunnaarsinneqarpoq. AWG-ertoqarneratalu sinnerani sungiusaasumit nakkutigineqarluni. AWG-p kingorna Alberta Northimit pillagaaniarpoq.

Pilo Samuelsenip Facebookimi allannerata kingorna aamma Jens Brinch taamatut akissuteqarluni allappoq. Paasitinneqarami ingerlaannaq allassimalluni, Jens Brinch oqarpoq.

AWG ajuusaarpoq

22-nik ukiulik aamma sungiusaasumit nakkutigineqaarluni naggataarnersiornermut peqataavoq.

Pineqartoq taanna peersinneqavittussaagaluarneranik, Pilo Samuelsenip isumaqarnini attatiinnarpaa.

- AWG anguniakkaminik naammassinninngilluinnartoq isumaqarpunga. Nakuusertoq nakuuserfigineqartumit eqqarsaatigineqarneruvoq. Peersinneqartussaagaluarpoq, Pilo Samuelsen oqarpoq.

Pisoq ajuusaarutigilluinnarlugu, Jens Brinch oqarpoq.

- Nukappiaraq pitsanngorluarnissaanik kissaapparput, taamatullu nuanninngitsumik misigisaqarnerata tulliani AWG-mut peqataarusussusaanik aseruisimannginnissaa neriuutigaarput.