Steen Lynge Demokraatinit qinigassanngortippoq
Nalunaaqutaq 11.00 tusagassiortunik katersortitsisoqarnerani Atassummi politikeriusimasoq Demokraatit qinigassanngortittoq saqqummiunniarpaat.
Nalunaaqutaq aqqanermut tusagassiortunik katersortitsinermut qaaqqusisoqarnerani Steen Lynge Demokraatit tunuliaqutigalugit qinigassanngortittoq saqqummiunneqassaaq. Sermitsiaq.AG taama tusagaqarpoq.
Steen Lynge siorna juunip tungaanut Atassummut ilaasortaavoq. 2013-mit 2014-imut attaveqatigiinnermut peqqissutsimullu naalakkersuisuuvoq. Aleqa Hammondip pisortat aningaasaataannik atuinera pillugu suliap kingorna tunuarpoq.
2014-imi qinersisoqarnerani sinniisup aappaattut inisissippoq, kisianni Knud Kristiansenip aamma Mala Høy Kúkop Naalakkersuisunut ilaasortaaneranni Inatsisartunut ilaasortaavoq.
Steen Lyngep siorna Atassutip nuna tamakkerlugu juunimi ataatsimiinneranni partiimit tunuarpoq. Tamanna partiimik piffissami sivisuumi naammagisimaarinninnginnerup kingorna pivoq. Piffissamili tassani arlaatigut politikkikkut ingerlaqqinnissani oqamisaarutigaa.
Tamanna tunuliaqutigalugu piffissami sivitsortumi Steen Lyngep Demokraatit ilaasortanngorfigissagai isumaliutersuutigineqartarpoq.