Torrak!
15-inik ukiullip filmiliaa KNR-ikkut takutinneqassaaq
Michelle Thårup Andersenip inuusuttut maligassiuisut pillugit piviusulersaarusiaa maanna innuttaasunit tamanit takuneqarsinnaalissaaq
15-inik ukiulimmut Michelle Thårup Andersenimut aallaqqaammulli anguniagaasimavoq. Taassuma inuusuttunik maligassiuisunik ilisarititsinermini amerlanerpaat anguniarsariniarpaa.
- Nuannersunik tarrarsorfigisinnaasatsinnik nassaarnissarput pisariaqartipparput, taanna siornatigut Sermitsiaq.AG-mut oqarnikuuvoq.
Maanna inuusuttunik maligassiuisunik 12-inik ilisarititsinera KNR-ikkut takutinneqartussanngorpoq.
Aamma atuaruk: 15-inik ukiullip maligassiuisunik filmiliorusunnini piviusunngortikkaa
Michelle 12-inik ukioqartorli isumassarsiaq pileriartorpoq, tassani nuannarisaminik sammisassarsiorpoq. Pilersaarutillu piviusunngornikuupput, arnaalu Margrethe suliniummut aningaasanik qinnuteqarnermut ikiuuppoq.
Michelle Thårup Andersenip siullermik inuusuttut 11-it Nuummeersut apersorpai, taakku timersortuupput, kulturikkut sammisaqartut imaluunniit angalasimasut. Taakku pujortarnermut hashimullu naaggaartuunertik ataatsimoorussaraat. Tamanna filminik naatsunik qulingiluanik inerneqarpoq, imalu qulequtaqarpoq: Maligassiuisut “Piginnaasatta nukkassartarpaatigut”.
Filmit ilisarititsinerillu Qaqortumi Katersugaasivimmi takutinneqarnerisa kingorna maligassiuisoq normu 12 ilannguppoq. Suliniut inuusuttunik nunap sinneraneersunik ilaartorneqarnissaa pilersaarutaavoq.
15-inik ukiullip suliniutini inersimasut tamanut ammasumik pitsaavallaanngitsumik oqallittarnerannut oqimaaluttatut isigaa.
- Naalakkersuinikkut suliaqartut amerlanerpaat ajortut oqaluuserineqarusarpaat, atukkallu qanoq pitsanngortissinnaanerlugit naammaginanngitsumik sammisarlugit. Taamaammat maligassiuisut pitsaasunik oqariartuutaannik saqqummiussinissaq pingaaruteqarpoq, taanna oqarpoq.
Piviusulersaarutip immikkoortua siulleq KNR-imi januaarip 28-anni nalunaaqutaq 21.00 takutinneqassaaq, immikkoortuata aappa februaarip 4-aanni, pingajuallu februaarip 11-anni.