isikkamik arsaanneq
Nunarsuarmi isikkamik arsallammak toqqarneqartoq
Cristiano Ronaldo ukiut tulleriisillugit marluk katillugillu tallimariarluni isikkamik arsallammattut toqqagaalluni Ballon d'Or nersornaat tiguaa.
Sisamanngormat Real Madridimi unammisartoq nersornaaserneqarpoq. Nersornaat isikkamik arsaattulerinermik atugassialerisartup France Football-ip, Paris-imi nersornaasiinernerani tunniunneqartarpoq.
Nersornaammut unammillertaasut marluk tassaapput FC Barcelonaminngaanneersoq Lionel Messi aamma Paris Saint-Germainip brasiliamiortaa Neymar.
Ajugaasoq isikkamik arsaattulerinermik tusagassiortut toqqaanerisigut toqqarneqartarpoq.
Taamaasilluni 32-nik ukiulik Cristiano Ronaldo-p Ballon d'Or-imik nersornaat ukiut marluk tulleriisillugit katillugillu tallimariarluni pissarsiaraa, tassa unammillertigiuakkami Lionel Messi amerlaqqataaanik nersorsaatisilluni.
Portugalimiup Argentinamiullu ukiuni kingullerni qulini nersornaat paarlakaallutit pissarsiarisarsimavaat.
Portugalimiu ukioq manna spaniami Real Madrid pissartanngoqatigaa, peqatigiiffiullu Champions League-mi pissartaanini aamma illersorlugu. Cristiano Ronaldo Champions League-mi aqqaneq-marlunnik isertitaqarluni isertitaqarnerpaasimavoq.
Allan Simonsen qallunaani kisiartaalluni Ballon d'Or pissarsiarinikuuvaa. Taanna 1977-imi nersorneqarsimavoq, taamanikkut Europamiut kisimik nersornaatisinneqartarsimapput.