Wednesday, November 8, 2017 - 15:54

Agathe: Pisiffiup imigassaq pillugu inatsimmut nutaamut akerliulluni tunngavilersuutai ajornannginaagaapput

Assi.: Leiff Josefsen
Imigassanik assiaqutsersuilluni tuniniaanerup annertunerulernissaa Pisiffimmik ilimagineqartoq, Agathe Fontainip ilimaginngilaa

Pisiffik Brugsenilu suleqatigiinnermikkut imigassamik assiaqutsersuilluni tuniniaaneq eqqunneqassangaluarpat qanoq isikkoqarsinnaanera tallimanngormat takuteriarpaat. Tallimanngornermilu tassani imigassamik tunisaqarnerumik kinguneqarpoq.

Misiliinermilu Pisiffiup pisortaata, Heine Stilling Jensenip, oqaatigaa siunertaasutut imigassamik tuniniaaneq – annikillinagu annertusissagaa. Taamaattoqassanngitsorli, Peqqissutsimut Naalakkersuisoq Agathe Fontain (IA) isumaqarpoq.

- Tunngavilersuutit taamaattut ajornannginaagaangaatsiarput, eqqumiiginarporlu aviisip Sermitsiaatut pimoorussisup tunngavilersuut taamaattoq isornartumik ataasinnguamilluunniit apeqquteqaqqaarani ilanngussinnaammagu. Annertunerusunik tunisaqarsimaneq assersuutigalugu pisiniarfiit imigassaq pillugu immikkut annertuumik ukkassinerannik patsiseqarsinnava? Imaluunniit qaammatip aallaqqaatigimmagu ajoraluartumik tamatigut ernguffiunerusarneranik patsiseqarsinnaava?, taanna tusagassiuutinut nalunaarummi allappoq.

WHO-mit innersuussutit

- Piniartarnermi pisortaaneq eqqortumik oqalunnerminut ima uppernarsaatissaqarluni: ”imigassamik assersuinerup tuniniaanermik annikillisitsisannginnera, nunani allani ilisimaneqarpoq”, oqaatigaattaaq. Nunalliuku suut pigai? Sermitsiaq.ag-ip apeqqutinik taamaattunik apeqquteqarnissaa tulluassagaluarpoq, taanna nangilluni allappoq.

Nunarsuaq tamakkerlugu peqqinnissaq pillugu kattuffissuup WHO-ip imigassamik atuinerup annikillisarneqarnissaanut innersuussutaa, Agathe Fontainip tikkuarpaa.

- Naalakkersuisut imigassat pisiniarfinni assersorneqarnissaannik siunnersuuteqarnerminni soorunami – innutaasunik niuertunilluunniit ajoqusersuiniarlutik asuli siunnersuusiunngillat. Nunarsuaq tamakkerlugu peqqinnissaq pillugu kattuffissuup WHO-ip imigassamik patsiseqartumik ajoqusernerit annikillisinniarnerannut atatillugu innersuussinera tunngavigalugu siunnersuutigaarput. 

- WHO ukiorpassuit ingerlaneranni imigassamut tunngatillugu ilsimatuussutsikkut paasisanik tunngaveqarluni pitsaaliuinerup siuarsarnissaa suliniutigaa. WHO-ip imigassamut tunngatillugu imigassap takussaaneranik, pissarsiariuminarneranik nittarsaanneqarneranillu killiliinissaq nunarsuaq tamakkerlugu iliuusissatut siunniussani innersuussutigaa.

- Innersuussutit taakku nunani assigiinngitsuni ilisimatuussutsikkut misissuinernik arlalinnik- immikkoortuni taakkunani pingasuni iliuuseqarnikkut imigassamik atuinerup appartinneqarsinnaaneranik imigassamillu patsiseqartumik ajoqusernerit annikillinerannik takutitsisunik- tunngaveqarput.

Nunat kisermaassinermik ingerlataqartut

- Imigassap assersorneqarnissaanut tunngatillugu pingaartumik nunat imigassamik kisermaassilluni nioqquteqarnermik eqqussisimasut ilinniarfiusinnaapput. Tassalu pisiniarfiit imigassaannarnik nioqquteqartut. Tamanna ilaatigut Savalimmiuni Islandimilu ullumikkut Nunani Avannarlerni imigassamik atuinnginnerpaaffiusuni atuuppoq, taanna allappoq.

- Imigassaq pillugu inatsisissatut siunnersuutip annertuumik oqallisaanera nuannaarutigaara. Oqallinnerli ajoraluartumik allannguutit arlaannik patsiseqartumik atorsinnaannginnerannik uppernarsaatissartaqanngitsunik sunnerneqarpoq.

- Ilisimatuussutsikkut uppernarsaatissartallit toqqammaviginiartigit sunniuteqartullu qitiutillugit, taanna nangilluni allappoq.

Seneste nyheder / Nutaarsiassat kingulliit