Thursday, November 9, 2017 - 09:09

Sulisitsisut: Imigassamut inatsit ajornartorsiutinik aaqqiissutaanngilaq

Imigassamut inatsit eqqartorneqangaatsiartoq, Agathe Fontainimit saqqummiunneqartoq, Sulisitsisunit isornartorsiorneqarput, ingammik immikkoortut marluk.

Ussaassaarisinnaanermik inerteqquteqarnikkut pisiniarfinnilunniit imigassanik ersigunnaarsaanikkut imigassamik atornerluineq akiorneqarsinnaanngilaq, Sulisitsisut erseqqissaapput.

Sverigimi atuisoqarnerulertoq

Islandimi Savalimmiunilu imigassamik tuniniaanerup kisermaanneqalernerata kingunerisaanik atuineq annikilleriaateqarsimasoq, Agathe Fontainip tikkuarsimavaa.

- Sverigemili atuineq qaffariarsimavoq, naak ukiorpassuarni imigassamik tuniaasinnaaneq kisermaassilluni ingerlanneqaraluartoq. Assersuutit takutippaat, atuinerup apparnissaa isumannaarneqarsinnaanngitsoq atuisunut immiaaqqanik, viininik imigassanillu
qaffasissumik aalakoornartulinnik pisiniarsinnaanerit ajornarnerulersnnerisigut, Karsten Lyberth-Klausen tusagassiuutinut nalunaarummi allappoq.

- Soorlu politiit naalagaannit tikkuarneqarnikuusoq, neriniartarfinni/imerniartarfinni malittarisassanik sukaterinerup matunerit kingorna festeqqittarnerit ingasannerulersissavai – annertuumik meeqqanut ajoqutaalersussamik, Sulisitsisut isumaqarpoq.

Pinaveersaartitsineq

Sulisitsisut eqqarsarluartoqarnissamik oqariartuuteqarput kaammaatuutigaalli suliffeqarfiillu iluameersumik pinaveersaartitsiniarluni
suliniuteqarnissamut suleqataassasut.

- Suleqatigiinnissamili pisariaqarput, tatigeqatigiilluni naapeqatigiissinnaanissaq aammalu oqartussaasut ammasumik suleriuseqarnissaat, Sulisitsisut tusagassiuutinut nalunaarummi allapput.

Inatsissatut siunnersuut ataasinngornermi ulloq 13. november aappaassaaneerneqassaaq, pingajussaaneerneralu ulloq 16. novemberi tassa Inatsisartut ukiaanerani naggataamik ataatsimiinnerani pissalluni.

Seneste nyheder / Nutaarsiassat kingulliit