Tuesday, November 7, 2017 - 15:59

Qaasuitsup Kommuniani sulisut aqqanillit nuukkusunngitsut

Assi.: Leiff Josefsen
Qaasuitsup Kommuniani sulisut 21-t Kommune Qeqertalimmut nuunnissaannik neqeroorfigineqarsimapput. Neqerooruteqarnerlu sulisunit sisamaannarnit akuerineqarpoq.

Kommuninngortussat, Avannaata Kommunia aamma Kommuneq Qeqertalik, kommunit atuutilernerini sulisut qanoq amerlatigisut Aasianni – Kommune Qeqertallip qiutiusumik allaffeqarfissaani – suliffimmik neqeroorfigineqarnissaat pillugu isumaqatiginninniarsimapput.

Sulisut 21-t Ilulissaniik Aasiannut nuunnissaat pillugu neqeroorfigineqarsimapput. Qaasuitsup Kommianilu allaffissornermut pisortaq, Hans Eriksen, Sermitsiaq.AG-mut paasissutissiaraa, sulisut Aasiannut nuunnissamut akuersisimasut sisamaannaasut, sulisulli aqqanillit Ilulissaniik nuukkusunngitsut.

- Sulisut taamak ikitsigisut Aasiaannut nuukkusunnerat tupaallannartuunngilaq. Ukiup aallartilaarnerani sulisut Aasiannut nuukkusussinnaanertik eqqarsaatigisinnaaneraat aperineqarsimapput. Taamanilu ilimatsaatereersimaarput Ilulissaniik nuukkusussinnaasut amerlanavianngitsut, Hans Eriksen oqarpoq.

Atuaruk: Kommunit avinneqarnerat: Ima amerlatigisut nuussapput

Avannaata Kommuniani suliffimmik neqeroorfigineqartut

Sulisut Kommune Qeqertalimmut nuukkusunngitsut aqqanillit, Avannaata Kommuniani atorfininnissamut neqeroorfigineqarsimasut, taanna paasissutissiivoq.

- Sulisut aqqanillit Avannaata Kommunia sulilernissaat inissereerpoq, Hans Eriksen oqarpoq.

Ilanngullugu paasissutissiaraa, sulisut pingasut sisamallu missaanni sulinngiffeqarneq napparsimanerluunniit peqqutigalugu nuukkusunnertik suli akissuteqarsimanngitsut.

- Sulisut nuukkusunnerlutik suli akissuteqarsimanngitsunut, ulloq 15. november kingusinnerpaamik akissuteqassasut, kommunaldirektøri Hans Eriksen oqarpoq.

Ulloq 1. januar Qaasuitsup Kommunia kommuninut marlunngorlugu avinneqassaaq.

Seneste nyheder / Nutaarsiassat kingulliit