Tuesday, November 7, 2017 - 14:22

Naalakkersuisut: Nunatsinni qinersiviit amerlineqarnissaannut pissutissaqanngilaq

Qinersiviit allanngortinneqarnissaannut siunnersuut Naalakkersuisunit taperserneqanngilaq
Assi.: Leiff Josefsen
Naak Inatsisartunut qinersinermi qinersiviit amerlineqaraluarpata illoqarfiit tamarmik Inatsisartuni ilaasortaatitaqarnissaat qulakkeerneqarsinnaanngitsoq, Naalakkersuisut isumaqarput. Taamaasillutik Naalakkersuisut Siumup siunnertuutaa tapersinngilaat

Siumup Inatsisartuni ilaasortaatitaasa qinersinermut inatsip qinersisinnaatitaanerlu sukateriffigineqarnissaanut siunnersuutaa, Naalakkersuisunit taperserneqanngilaq.

Siumup Inatsisartuni ilaasortaatitaasa qinersinermut inatsip allanngortinneqarnissaa siunnersuutigisimavaa, tassani partii kissaateqarluni siunnersuutigaa Inatsisartunut qinersisoqartillugu – ullumikkut nuna tamakkerlugu qinerseriaaseq atorunnaarlugu – qinersiviit amerlineqassasut.

Naalakkersuisut akissuteqaammi allapput, Siumumit siunnersuutigineqartoq tapersernagu.

- Aaqqissuussinermik taamaattumik atuutsitsisoqaleqqissappat, illoqarfiit tamarmik Inatsisartuni ilaasortaatitaqalernissaat qulakkeerneqarsinnaanngilaq, qinersivimmi ataatsimi qinikkat tassaasinnaammata qinersivimmi illoqarfimmit ataatsimit amerlanerusunilluunniit pisut, kisiannili illoqarfiit tamakkerneqaratik, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq, Erik Jensen (S), Naalakkersuisut sinnerlugit allappoq.

Seneste nyheder / Nutaarsiassat kingulliit