Sunday, November 5, 2017 - 09:52

Sisimiuni aqqusinniornissaq Inuussutissarsiornermi Siunnersuisoqatigiit

Arctic Circle Business-imi siulittaasoq, Jens Christian Eldevig.
Assi.: Arctic Circle Business
Sisimiuniik Kangerlussuarmut aqqusinniornissamut Naalakkersuisut iliuuseqarnissaannik borgmester Malik Berthelsenip piumasaqarnera, Inuussutissarsiornermi siunnersuisoqatigiit Arctic Circle Business-p taperserpaa.

Qeqqata Kommunia borgmester Malik Berthelsen, Naalakkersuisut aqqusinniornissamut aalajangertariaqartut, tallimanngormat kaammaattuuteqarfigai. Taamatulli kaammattuuteqarneq Inuussutissarsiornermik Siunnersuisoqatigiit Arctic Circle Business, Sisimiuni qitiusumik allaffeqartoq, tapersiivoq.

Anguniagaraarput Destination Arctic Circle-p maannamiit amerlanerujussuarnik takornarissanik tikinneqartalernissaa, tamannalu angussagutsigu nittarsaassineq annertunerusoq kiisalu angallannikkut periarfissat annertunerusut pisariaqarput, Inuussutissarsiornermi Siunnersuisoqatigiit nalunaaruteqarput.

Atuaruk: Naalakkersuisut iliuuseqarnissaat borgmesterip piumasaraa

- Taamaattumik Qeqqani Inuussutissarsiornermi Siunnersuisoqatigiit, suliffeqarfinnit 80-init ilaasortaaffigineqartup manna borgmesterip Naalakkersuisunut piumasaqaateqarnera taperserniarpaa, Arctic Circle Business-imi siulittaasoq, Jens Christian Eldevig, tusagassiuutinut nalunaarummi allappoq.

Nuna tamakkerlugu ineriartortitsineq

- Taamaaliorunillu Naalakkersuisut namminneq anguniagarisartik, tassalu nuna tamakkerlugu ineriartortitsineq piviusunngortissavaat, tamannalu Qeqqata Kommunia tamaat isigalugu aningaasaqarnermut iluaqutaassaaq, siulittaasoq oqarpoq.

Aasivissuit – Nipisat UNESCO-p nunarsuarmioqatigiinnut kingornussassanngortitaannut ilanngunneqassangaluarpat, takornarissat amerliartuinnarnissaat Arctic Circle Business-imiit naatsorsuutigineqarpoq.

Pinngortitamik kulturikkullu neqerooruteqarnerit

- Destination Arctic Circle-mi taamaalilluta piareersimasussaavugut pinngortitamik kulturikkullu misigisassanik takornarissanut neqerooruteqarluassalluta. Qimusserneq, nunami imaatigullu angalaarnerit, pisunnerit, aalisariarneq, tammajuitsussarsiorluni piniarneq allarpassuillu neqeroorutigalugit.

Aqqusinertaassap Qeqqata Kommunianut iluaqutissaasa ilai Inuussutissarsiornermi Siunnersuisoqatigiit ersarissarpaat:

  • Angallannikkut periarfissat pitsaanerusut aningaasaliinissamut periarfissat annertusassavaat, takornariaqarnikkut misigisassanik nutaanik ineriartortitsinissaq Sisimiuni Kangerlussuarmilu periarfissagissaarnerulissaaq.
  • Nunami annertuumik periarfissalimmi takornarissat Sisimiuniit Kangerlussuarmiillu angallavissaat amerlanerusut pilersinneqassapput, taamatullu takornariaqarnermi suliaqartut amerlissallutik. Aqqusinniornerullu kinguneranik unnuisarfinnik sanaartorneq angallassinermiillu kaaviiaartitsineq annertunerulissaaq.
  • Takornarissanut aqqutit pitsaanerit kingunerissavaat pisuttuartitsinerit amerlanerulernissaat, takornariartaatiniillu takornarissat tikittartut ukiormanna 27.000-iusut suli amerliartornissaat naatsorsuutigaarput.
  • Aqqusineqalernitta kingunerissavaa ukioq kaajallallugu takornarialerisut nunaqavissullu angalasinnaalernerat, nunatarmi siornatigut tikinneqariaannaanngitsoq tikinneqarsinnaalissaaq.
  • Aqqusinniornerup nunami angallanneq isumannaannerusoq kingunerissavaa.
  • Qeqqata Kommuniani niuernikkut sanaartornikkullu annertunerusunik suliassaqalernissaq naatsorsuutigaarput, taamatullu tammajuitsussarsiortunik piniartitsisartut angalasullu allat kaaviiartitaat annertusissapput. Tamakku katikkaanni suliffissat amerlasuut pilersinneqarnissaat naatsorsuutigaarput suliassaqarfiillu ukiup ilaannaani suliassaqarfiusaraluartut ukioq kaajallallugu
  • suliassaqalernissaat naatsorsuutigaarput.
  • Aatsitassarsiornikkut misissueqqaarnerit annikinnerusut eqqarsaatigalugit nunataq tikinneqarsinnaalertussaq periarfissanik ammaassissasoq aamma naatsorsuutigaarput, angallannikkummi aningaasartuutit misissueqqaarnerni annertuut annikillisinneqarsinnaammata.

Najukkami innuttaasunut iluaqutissaq

Aqqusinissaq inuussutissarsiortut kisimik iluaqutiginavianngilaat, kisiannili innuttaasut tamarmik nunami angallannikkut periarfissagissaarnerulernermikkut pinngortitamik atuinerulernissaat naatsorsuutigaarput, Arctic Circle Business isumaqarpoq.

- Taamaattumik neriuppugut Inatsisartuni partiit Naalakkersuisullu Qeqqata Kommuniani piujuaannartitsineq aallaavigalugu ineriartortitserusunnerput taperserlugu qanoq iliuuseqaqataarusussasut, uagummi aamma ineriartorneq takornariaqarnermilu annertusaaneq pisariaqartipparput, Inuussutissarsiornermi Siunnersuisoqatigiit oqarput.

Aamma atuaruk: Qeqqata Kommunia aqqusinniornissaq pillugu paasisaqarusuppoq

Seneste nyheder / Nutaarsiassat kingulliit