Sunday, November 5, 2017 - 15:51

Peqqinnartunik nerinissaq pingaarluinnarpoq

Daniel Petrovic assani atornerullugit body sds-mik katsorsaasarpoq. Isumaqarporli imminut paarilluarnerunikkut napparsimalersarnerit pitsaaliorneqarsinnaasut.
Assi.: Leiff Josefsen
Peqqinnissaqarfik aningaasarpassuarnik sipaarsinnaagaluarpoq innuttaasut peqqissuuniarlutik namminneq iliuuseqarnerusuuppara, saqqummiussisartoq oqarpoq taassumalu ikinngutini qaninnerit arlallit kræfti pissutigalugu annaasimavai

Kræftimik inooriaatsimillu pissuteqartumik napparsimasut amerlinerat Daniel Petrovicimut eqqarsariaqartitsivoq taannalu katsorsaariaatsimik body sds-mik aallussisuuvoq.

 – Nammineq iliuuseqarnikkut pitsaaliuineq inuiaqatigiinnut koruuninik millionerpassuarnik sipaarutaasinnaavoq, oqarpoq.

Nakorsiaq nallavimmiippoq allarummik qipissimalluni oqaluttuaralugulu sumi annernartoqarnersoq. Assani kisiinnangajaasa atorlugit nakorsiap timaani toortaalluni katsorsaasarpoq.

Daniel Petrovic arlaleriarluni Nunatsinniittarnikuuvoq ikinngutitaartorluarsimalluni. Allarpassuilli assigalugit maluginiarpaa inuppassuit suli ukioqqortusinatik kræfteqalersartut imaluunniit inooriaatsimik pissuteqartumik napparsimalersartut eqqarsartaatsikkulluunniit aporfeqalersarlutik.

- Kalaallit timertik ilisimalluartuuaat, aammali naammattoortakkakka malillugit peqqinnanngitsumik nerisaqarnikkut akuutissanik suliffissuaqarnermi pilersitaasunik pisariaqanngitsumik timiminniittoqalernissamut eqqorteqqajaasuupput. Qularinngilluinnarpara Kalaallit Nunaat tassaalersinnaasoq peqqissumik inuuneqarfiullunilu aningaasarsiornikkut ingerlalluarfiusoq, Daniel Petrovic oqarpoq torrutiinnarlugulu naatsorsuusiorluni.

- Oqariarutta napparsimalersoq ukiumut 400.000 koruuninik aningaasarsiaqartartoq. Taanna ukiut tallimat napparsimassappat inuiaqatigiit 2 millioner koruuninik annaasaqassapput ingerlaannarlu naatsorsorsinnaavarput inuit amerlasuut napparsimaneranni aningaasarpassuit annaaneqartartut, Daniel Petrovic oqarpoq.

Taanna isumaqarpoq innuttaasut ataasiakkaat akissaaffigigaat napparsimaqqajaasarnerup illuanut saatinnissaa.

- Kalaallit Nunaata pinngortitarsua aallartiffissaqqipppoq. Sorpassuit iluarsaanneqarsinnaapput asimi pisuttuarlunilu eqqissisimaarnikkut. Nerisat kukkusut, puullaaqineq sinnakilliortarnerlu pissutigalugu timi eqqagassartaqalersarpoq napparsimalissutigisakkatsinnik, Daniel Petrovic oqarpoq.

Taassuamali oqarnera malillugu iliuuseqarnissaq oqaannarnermiit ajornarneruvoq peqqinnissamik siuarsaassagaanni aaqqissuusaasumik iliuuseqartoqartariaqarmat. Arctic Winter Gameseqartarnerani timersornermi ajoqusertunik passusisartutut arlaleriarluni peqataanikuuvoq.

- Ajoraluartumik arlaleriarlunga takusarnikuuara inuusuttut timersortartut peqqinnanngitsunik soorlu chipsinik nerivallaarlutillu sodavanditorpallaartartut nerisassat peqqinnarnerusut atorlugit nukissanik aallernissaraluaq tunulliullugu, Daniel Petrovic oqarpoq nangillunilu:

- Suliamik ilisimasallit peqqinnarnerusumik inooriaaseqalersitsiniarnermi ilanngunneqartariaqarput. Uani pineqarpoq inuit peqqinnerulernissaannut aningaasaliineq. Eqqaaneqareersutut inuit napparsimalersarnerat aningaasarpassuarnik akeqarpoq. Meeqqat inuusuttuaqqallu peqqinnarnerusumik inooriaaseqalernissaannut aqqutissiortariaqarpagut taamalu siunissami pisariaqanngitsumik peqqinnissaqarfimmut aningaasartuutaalernissaat pitsaaliorlugu, Daniel Petrovic oqarpoq.

Taanna maanna Nuummiippoq saqqummiiartorluni. Erseqqissaatigalugu sullissaqarnerulernissani siunertaralugu Nunatsinnukarani. Nammineq oqarnera malillugu sullissaqarnissamut ullorsiutai ulikkaareersimapput.

- Kalaallit Nunaannut aallarusuummerpunga Kalaallit Nunaanni ikinngutikka arlallit siusippallaarujussuartumik toqukkut annaagakkit kræfti pissutigalugu ilisarisimasakkalu arlallit nappaassuarmik tassannga aamma atugaqarlutik. Taamaattumik peqqinnarnerusumik inooriaaseqalernissap siammarternissaa assut pingaartippara, Daniel Petrovic naggasiivoq.

Seneste nyheder / Nutaarsiassat kingulliit