Friday, November 3, 2017 - 07:01

Nunanit allaneersut amerlanerusut Nuummut nuussapput

Assi.: Illustration/Assi.: Kommuneqarfik Sermersooq
Siorarsiorfiup inuiaqatigiit aningaasaqarneranut sunniutissaanik nalilersuinermi 2049-p tungaanut innuttaasunit nutaanit isertitat ilanngullugit naatsorsuunneqarsimapput. Illoqarfinnit allanit Nuumminngaanniinngitsoq nuuttut 4.000-it saniatigut innuttaasut nunanit allaneersut 1.000-it nutaat ilanngullugit naatsorsuutigineqarput. Sermitsiaq misissueqqissaarnermi tunngavigineqartunik paasissutissanik takunnissinnaatitaanermik pissarsisimavoq taakkualu immikkut ilisimasalimmut misissuataartillugit

Kommuneqarfik Sermersooq qaammatip aappaata affaani iluatsinneq ajuleqqareerlugu inuiaqatigiit aningaasaqarnerannut nassataasussanik misissueqqissaarnermut, kukkunersiuisut suliffeqarfiannit EY-imit kommuni sinnerlugu suliarineqartumut, tunngavigineqartunik Sermitsiaq kiisami pissarsivoq. 

Aalborg Universitetimi aningaasarsiornermut tunngasuni professori, Per Nikolaj Bukh, misissueqqissaarnermik, naatsorsuinermi tunngavigisanik mailsinillu Kommuneqarfik Sermersuumi sulisut aamma kukkunersiuisut suliffeqarfiata EY-ip kiisalu suliffeqarfiup Bendix Consul-tip akornanni allaqatigiissutigineqartunik saqqummiussivigineqarpoq. 

Misissueqqissaarnermi Siorarsiorfiup pilersinneqarnerani inuiaqatigiit aningaasaqarnerannut annertoorujussuarmik iluanaarutaanissaa inerniliissutigineqarpoq, tamatumunngalu pingaartumik innuttaasunit piffisssami 2018-imiit 2049-mut Nuummut nuuttunit isertitat tunngavilersuutigineqarlutik. 

1.000-t sinnerlugit

Innuttaasut nutaat ataatsimut isigalugu piffissap ukiunik 30-nik sivisussuseqartup ingerlanerani taamaalillutik 8,6 milliarder koruuninik tunniusseqataassapput. Tamatuma saniatigut misissueqqissaarnermi 210 millioner koruunit sanaartorfigissaanermit isertitarineqarnissaat naatsorsuutigineqarpoq. Kisitsisit taakkua tunngavigalugit Siorarsiorfiup aningaasaliifgineqarnera inuiaqatigiinnut ukiut ingerlaneranni niuerluarnermik inerneqassasoq, misissueqqissaarnermi allaatigineqarpoq. 

Per Nikolaj Bukh naapertorlugu paasissutissat immikkuualuttut tigussaasut nalilersussagaanni misissueqqissaarneq annertooq pisariaqarpoq. Kisianni inuiaqatigiit aningaasaqarnerannut sunniutissanik misissueqqissaarnermi amerlanertigut isornartuusartut tassaapput isertitanut tunngassuteqartut – tassa imaappoq siuariartorneq, misissueqqissaarnerni taama ittuni taakkua ilimagisanik eqqqortuuneri uppernarsassallugit ajornakusoortorujussuarnik tunngaveqartarmata. 

Tamatumanilu nalorninaatillit isornartut misissueqqissaarnerullu inernerata qanoq nassuiarneqarnerata eqqumaffiginissaat pingaaruteqarpoq. Tamatuma peqatigisaanik misissueqqissaarnermi innuttaasunit nutaanit piffissaliussami sivisoorujussuarmi, tassa 2018-imiit 2049-mut, isertitat aallaavigineqarnerat eqqumaffigissallugu pingaaruteqarpoq. 

– Taamaattumik missingersuinermit Naatsorsueqqissaartarfimmit suliarineqarsimasumit 2030-mi innuttaasut immaqa taamaallaat 1100-nik amerlanerusut pineqaraluartut, taakkua ukiut ingerlaneranni kommunimut isertitarpassuarnik pilersitsissapput, malugalugu taakkua Nuummi ullumikkut innuttaasunut assinguppata, Per Nikolaj Bukh oqarpoq 

Allaaserisaq tamakkerlugu Sermitsiaq avisiimi, ullumi tallimanngornermi saqqummertumi atuarsinnaavat. Aviisip pisiarinissaanut uani periarfissaqarputit:

Seneste nyheder / Nutaarsiassat kingulliit