Skip to main content

Pisortaaneq: Piffissami annertuumik unammilligassaqarfiusumi allannguinerit

- Sulisuvut akuutissavavut, piginnaasar­passuavut atorluassallugit sullitatsin­nullu akuersaartuussalluta, Mittarfeqarfiit juunip aallaqqaataanili pisortaa Marie Fleischer, Nuummi Telep napasuliartaanit allaffimminit, oqarpoq.

Marie Fleischer Kommuneqarfik Sermer­suumit aaneqarpoq, tassanimi ukiut inger­laneranni pisortatut arlalinnik atorfeqarsi­mavoq ilaatigut inuussutissarsiornermut aamma Sermersooq Business Concilip pilersinneqarneranut ineriartortinneqarne­ranullu. Kommunerujussuarmi allanngor­titerinermik ineriartortitsinermillu misilittakkani tunngavigerpiarlugit Mittar­feqarfinni atorfik qinnutigisimavaa. 

Unammilligassat annertuut

Taakkorpiaammi pisortat suliffeqarfiuti­toqaanni nipaalluinnarluni inooqataasima­sumi maannali timmisartuussinerup iluani ineriartornerup aamma Kalaallit Airports A/S­ip pilersinneqarnerisigut annertuunik unammilligassaqalersimasumi pisariaqartinneqarput. 

Marie Fleischer atorfinimmalli suliffeqar­fik eqqartorneqarnerujussuanngorsimavoq, Mittarfeqarfiillu nuna tamakkerlugu najuk­kani inuiaqatigiinnut pingaarutilimmik ilaasutut innuttaasunit isigineqarnissaa Marie Fleischerip periusissiaanut erseqqis­sumik ilaavoq. 

Aningaasaqarneq

Mittarfeqarfinni aningaasaqarnermut pingaartumik Kangerlussuarmi, Nuummi, Ilulissani Kulusummilu ingerlatsinikkut sinneqartoorutit ullumikkut tunngaviupput. Sisimiuni ingerlatsineq imminut akilersin­naakannersumik ingerlavoq, kisiannili mit­tarfiit qulimiguulinnullu mittarfiit sinneri amigartooruteqarlutik ingerlallutik. Tama­tuma saniatigut suliffeqarfiup namminer­sortitaasup Namminersorlutik Oqartussanit pigineqartup 13 millioner koruuningajaasut nunatta karsianut ukiumut akilertarpai. Taamatumunnga tunngavilersuut puigorne­qapajaarsimavoq. Mittarfinnut ataasiakkaa­nut naatsorsuutini erniat sanaartukkanullu nalikilliliinerit ilanngunneqarpata Kanger­lussuaq kisimi sinneqartooruteqarluni ingerlavoq. 

Taamaattumik Kalaallit Airportsip pilersinneqarnerata kinguneranik Mittarfeqarfiit sumiiffiit iluanaaruteqarfiunerpaasartut ilaannik annaasaqaratarsinnaanera sulisut aqutsisullu akornanni eqqissiveerunnermik pilersitsinera malugineqarluarsinnaavoq. 

Sulisunik pingaartitsineq

Marie Fleischer tamakkuninnga unammilli­gassaqarpoq. 

– Tamanna allannguinissamik suniarnit­sinnillu eqqarsaatiginninnissamik piuma­saqarfiuvoq. Pingaaruteqartorli tassaavoq ineriartornermut nalaatilikkatsinnut sulisu­nik akuutitsinissarput. Sulisut isumalluutitta nukittunersaraat, taakkualu piginnaasaat suliffeqarfiup siunis­saanut aalajangiisuupput. 

Marie Fleischer suliffeqarfimmut periusis­siaminik takorluukkaminillu maannamuu­gallartoq suliaqarsimavoq. 

Marie Fleischerip apeqqarissaarfigitinnera Sermitsiaq aviisimi tamakkerlugu atuaru, aviisi digitaliusoq uani pisiarisinnaavat:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER