Thursday, November 2, 2017 - 15:18

Qeqqata Kommunia aqqusinniornissaq pillugu paasisaqarusuppoq

Naalakkersuisuit aqqusinniortitsinissamut nassuiaateqarnissaat Qeqqata Kommuniata piumasaraa
Assi.: Qeqqata Kommunia
Qeqqata Kommuniani attaveqaqatigiinnermut ineriartortitsinerup unittooqqanera Qeqqata Kommuniani kommunalbestyrelsip ernimanartoqartippaa

- Qeqqata Kommuniani attaveqaatit ineriartortinniarneqarnerat unittooqqavoq, Sisimiut Kangerlussuullu akornanni aqqusinniortoqarnissaalu kissaatigalugu.

Kommuni tusagassiuutinut nalunaarummi allappoq.

Aqqusinniornissap unittooqqanera kommunalbestyrelsimi ilaasortat ernumassutigingaatsiarpaat.

Atuaruk: 150 kilometerinik isorartutigisumik aqqusinniornissamik sinnattoq aallartisarneqalertoq

Ineriartorneq uninngatinneqartoq

- Inuutissarsiutit ineriartortinneqarnissaat unikaallatsinneqassaaq, takornarialerisullu ineriartortitsinissamik pilersaarutiminnik aallartitsisinnaanatik. Sisimiut Kangerlussuullu akornanni nunataq, UNESCO-p nunarsuarmioqatigiinnut kingornussassanngortitaannut ilanngunneqassasoq aamma naatsorsuutigineqarpoq, nunarsuarmioqatigiinnulli kingornussassanngortinneqartup tikikkuminaannera pillugu nunaqavissut takornarissallu misigisaqarfigisinnaassanngilaat,
aqqusineqaraluarpammi misigisaqarfigisinnaassagaluaramikku, tusagassiuutinut nalunaarummi erseqqissaassutigineqarpoq.

Qeqqata Kommuniatalu paasisinnaanngilaq sooq Kangerlussuarmiik Sisimiunut aqqusinniornissaq Naalakkersuisunit pingaartinneqannginnera.

- Namminersorlutik Oqartussat mittarfiliassat annertuumik sammisarigaat, pilersaarutillu taakku arlaannaalluunniit Qeqqata Kommunianiinngitsoq isertuunneqarsinnanngilaq, taamaattumik Kangerlussuup Sisimiullu akornanni aqqusinniassamut attaveqaatitigut pilersaarutinut tunngatillugu Naalakkersuisut iliuuseqarnissaat kissaatigaarput, oqaatigineqarpoq.

Atuaruk: UNESCO-mut qinnuteqaatissaq alla piareersarneqarpoq

Paasitinneqarnissamik piumasaqartut

Sisimiuni imeqarfimmut tunngatillugu aaqqiissutissarsiornissami avatangiisinut sunniutaasinnaasut pillugit naliliinissaq akimmiffiginagu aasamut Kangerlussuup Kangerluarsuk Tulleq-ullu akornanni, taamaalillunilu Kangerluarsuk Tulleq-up Sisimiullu akornanni aqqusinniortoqarsinnaaqqullugu, borgmester Malik Berthelsen (S) kommunalbestyrelsi sinnerlugu Naalakkersuisut qinnuteqarpoq, avatangiisinut sunniutaasinnaasut pillugit nalilersuinissaq aaqqiissutissarsiorfigeqqullugu.

- Sisimiut Kangerlussuullu akornanni asfaltigaanani aqqusinissamut tunngatillugu suliassap nassuiaataa, Naalakkersuisunit atsiorneqarnissaa Qeqqata Kommuniata aamma qilanaaraa, suliassammi nassuiaataa pigineqartillugu aqqusineq asfaltigaanngitsup piviusunngortinneqarnissaanut suliaq ingerlateqqqinneqarsinnaalissammat, taanna oqarpoq.

Aammattaaq Malik Berthelsen periarfissat piviusunngortinneqarnissaannut pilersaarutit Inatsisartunut Naalakkersuisunullu saqqummiutissallugit piareersimavoq.

Atuaruk: Qeqqata Kommunia takornariaqarfinngussaaq

Seneste nyheder / Nutaarsiassat kingulliit