Skip to main content

Aalisarneq pillugu aaqqissuusseqqinnermi nunap aqutsisuit ilungersunartorsiorput

Savalimmiuni naalakkersuisut aalisarneq pillugu aaqqissuusseqqinnissaq, naak amerlanerussuteqartuni siunnersuut isumaqataaffigalugu atsioreersimangaluaraat, amerlanerussuteqarfigineq ajuleqqavaat,

Naalakkersuinikkut ilungersunartorsiornerup kingunerisinnaavaa lagmand Aksel V. Johanneseni qinersinissamik suaarutiginninnissaa. Massakkut aalisarnermik akuersissutit ulloq 31. december qaangiuttussaapput, taamaammat naalakkersuisut qaammat avillugu aaqqiissutissamik nassaarniarnissamut periarfissaraat.

Arlaleriarluni nalimmassarneqartoq

Nittartartagaq nutaarsiassaqartitsivik in.fo arfininngormat allappoq, lagmandspartiimi ilaasortat marluk, Bjarni Hammer aamma Kristin Michelsen aaqqissuusseqqinnermut tapersiinngitsut. Siunnersuut arlaleriarluni nalimmassarneqartarsimangaluarpoq naalakkersuisoqatigiinnit tamanit taperserneqarnissaa pillugu.

Tjóðveldi, Javnaðarflokkurin aamma Framsókn naalakkersuisoqatigiinnerat allatigut aamma unammillernartoqarfiuvoq. Savalimmiunimi tunngaviusumik inatsissatut siunnersuut akuerineqarnissaa suli maannamut iluatsissimanngilaq.

Naalakkersuisoqatigiit utoqqalinersiaqarnissamut aaqqissuusseqqinneq amerlanerussuteqarfiginissaa anguniarlugu Selvstyreparti lagtingimi marlunnik ilaasortaatitaqartoq isumaqatigiissuteqarfigisariaqarsimavaa.

Ilaasortat 16-it

Naalakkersuisoqatigiinni ilaasortat 16-iupput taamaammallu lagtingimi ilaasortat 33-it akornanni amerlanerussuteqaratik. Naalakkersuisoqatigiit minnerpaamik amerlanerussuteqarumallutik attaviitsoq Sonja Jógvansdóttir suleqatigaat. Utoqqalinersiaqarnermullu aaqqissuusseqqinnerit ilumut tapersissanerai nalunarpoq.

Nutaamik naalakkersuisoqatigiiliornissaq eqqarsaatigineqartoq

Kringvarp Føroya (Savalimmiuni nutaarsiassalerinermik kiffartuussivik) naapertorlugu naalakkersuisut Midterparti marlunnik ilaasortaatitaqartoq naalakkersuisoqatigiinnermik isumaqatigiissuteqarfiginissaanut periarfissanik misissuisimapput.

Siulittaasoq Jenis av Rana Kringvarp Føroyamut oqaatigaa, naalakkersuisut sapaatip-akunneri sisamat matuma siorna partiimut attaveqarsimasoq.

Jenis av Ranap oqaatigaa, partiip naalakkersuisoqatigiinni tapertaanissani kissaatiginngikkaa, taamaattoq naalakkersuisoqatigiinni suleqataalissangaluarunik qulequttanik 18-inik piumasaqaasiorsimasut.

Nutaamilli naalakkersuisoqatigiinnik pilersitsinissamut tunngavissaqarnersoq pillugu, Lagmand Aksel V. Johannesen nalunaaruteqarsimanngilaq.

Sapaatip-akunnerata naanerani nuna tamakkerlugu ataatsimiinnerit

Illuatungiliuttuni partii annerit marluk Sambandspartiet aamma Folkeflokken sapaatip-akunnerata naanerani nuna tamakkerlugu ataatsimiittussaapput. Qinersinissamullu pilersaarusiornissaq eqqartugassanut ilaapput.

Naalakkersuisoqatigiinni partiit siulittaasuisa pingasut naalakkersueqatigiinnermi ilungersunartorsiorneq oqaaseqarfigisimanngilaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER