Ajugaaneq: Aaja aamma Aleqa illersornissamut tunngasunik isumaqatiginninniaqataassapput

Kalaallit Folketingimut ilaasortat marluk illersornissaq pillugu isumaqatiginninniarnermut ilanngunneqassasut, danskit illersornissamut ministeriata aamma aningaasaqarnermut ministeriata ullumi allakkatigut nalunaarutigaat.

- Ukiut marluk sinnerlugit Inuit Ataqatigiit illersornissaq pillugu isumaqatiginninniartoqarneranut ilanngunneqartarnissarput toraagaralugu suliniutigaat. Taamaammat ajugaanertut isigaara, Aaja Chemnitz Larsen (IA) Sermitsiaq.AG-mut oqarpoq.

Allagaq Aaja Chemnitz Larsenimut tupaallaataavallaanngilaq, aggustimili ilanngunneqarnissamut neriorsorneqareernikuugami. Qaammatip ataatsip matuma siorna illersornissamut ministeri marlunngorpat tulliani ataatsimeeqatiginissaanut isumaqatigiissuteqarnikuuvoq.

- Taama annertutigisumik ilanngunneqarnerput oqaluttuarisaanermi siulliuvoq, taanna oqarpoq.

Apeqqut uteqattaarlugu qaqittuarnerata qaaqqusissut kingunerigaa, taanna isumaqarpoq. Tamatuma saniatigut illersornissamut politikki pillugu tusarniaatitsivoq, IA-lu aamma illersornissamut politikkimut siunnersuuteqarsimalluni.

- Tunngaviusumik uanga aamma Aleqa Hammond maanna isumaqatiginninniarnernut ilanngunneqarnerput naammagisimaarpara, taanna oqarpoq.

Aleqa Hammondip (UP) aamma isumaqatiginninniarnernut ilanngunneqarnini naammagisimaarpaa.

- Soorlu oqaatigiuaringa, pingaaruteqarluinnarpoq illersornissamut isumaqatigiissutissap suliarinerani kalaallit
folketingimi ilaasortaatitai aammalu Namminersorlutik Oqartussat isumasiorneqartariaqartut suliassat
aammalu iliuuserisassat Issittumut Nunatsinnullu annertuumik sunniuteqartussaammata, taanna tusagassiuutinut nalunaarummi oqarpoq.

Aaja Chemnitz Larsenilli (IA) assani tamakkiisumik qullarpallaanngilai. Naak illersornissamut isumaqatigiissummut sunniuteqaraluarluni, partiit isumaqatiginninniarnerat sivisuumik ingerlareerput. Aallartinneranit ilaarusukkaluarpoq.

- Tamanna ingerlariarneruvoq, alloriarnerujussuullunilu, taanna oqarpoq.