Narsaq
Scooterit nersussuillu arsaattarfik ivigaasalik aserorterpaat
Piffissami kingullermi scooterit knallertillu Narsami ivigaasanik arsaattarfittaami ingerlaartarsimapput. Nersussuillu aamma arsaattarfimmut soqutiginnipput. - Tamanna arsaaffimmut aserorterivoq, innuttaasoq oqarpoq.
- Scooterinik aamma knallertinik Narsami arsaattarfimmi ivigaasalimmiingerlaarneq unitsinneqarli.
Josef Petersen Narsami najugaqartoq taama kajumissaaruteqarpoq. Taanna naapertorlugu innuttaasut arlallit ivigaasani arsaaffimmi ingerlaartunik takunnittarsimapput. Arsaattarfik oktobarip 20-anni atoqqaarfissiorneqassaaq.
- Innuttaasut malunnarpoq arsaattarfik assorsuaq erligigaat, akisoqimmat, meeqqanut allanullu iluaqutaallunilu pinaveersaartitsinermut iluaqutaasussaammat, Josef Petersen erseqqissaavoq.
Taassuma scooterit aamma knallertit illoqarfimmi malittarisassanik malinninnersut politiinit misissoqqullugu kaammattuutigaa.
Aamma atuaruk: Narsami ivigaasaaqqanik arsaattarfissaq naammasilerpoq
- Knallertit scooterillu qulleqanngitsut, aamma isumannaallisarneqanngitsut takuneqarsimapput. Taamaammat ajortumik pisoqannginnerani politiit misissuinissaannut kaammattuivugut, taanna oqarpoq.
Scooterit aamma knallertit kisimik arsaattarfimmik aserorterinngillat.
- Naggataatigut aamma maanna nersussuit alutornartaraluaqisut ilaatigut arsaattarfittaaq qaqiffigisalersimammassuk piginnittoq aamma kaammattuutigineqarpoq, nersussuaatini neriniartinneranni arsaattarfik ungalassimaqullugu. Immaqa qorsooqqeqimmat nersussuit illigitsaassimaqaat, Josef Petersen qungujulluni oqarpoq.