Pinngortitami ajunaarnersuaq
Illorsuarni siunissaq neriuutigigaat
Upalungaarsimanermik Ataatsimiititaliap nalilerpaa, Nuugaatsiami Illorsuarnilu innuttaasut uternissaat navianarpallaartoq. Taamaattoq Illorsuarni inuusuttut aappariit nunaqarfimmi siunissaqarnissartik neriuutigaat.
Nunatsinni Upalungaarsimanermik Ataatsimiititaliap nalilerpaa, Nuugaatsiaq Illorsuillu suli aarlerinarsiorfittut isigineqartariaqartut, taamaammat nunaqarfinni taakkunani innuttaasut angerlartinneqassappat imminut illersorsinnaanngitsoq aammattaaq nalilersimallugu.
23-nik ukiulik Sara Lyberth februaarip qaammataaniilli Illorsuarni najugaqalersimasoq, massakkut nunaqarfimmut uteqqikkusunngikkallarpoq.
- Qaqqammi ilaa suli aarlerinartorsiortitsivoq, piffissamilu matumani uatsinnut toqqissisimanarani, taanna Sermitsiaq.AG-mut oqaluttuarpoq.
Sara Lyberthip oqaluttuaraa ullut kingulliit 14-nit inuunermini ajornerpaasut.
- Piffissami sivikitsuaqqami inuunerput mumisinneqarpoq. Illorsuit alianaatsorujussuuvoq, neriuutiginerpaavarali nunaqarfimmut uterluta naliginnaasumik inuuneqaqqilernissarput. Kisianni ullumikkutut ittoqartillugu, nuna sisooqqeriaannaatillugu utissagaluarutta uagutsinnut toqqissisimananngippallaaqaaq, Sara Lyberth oqarpoq.
Sapaatit akunnerini marlunni pisut taassuma aappaanut, Aannguaq-Nuka Korneliussenimut eqquineq sakkortunerusimavoq.
- Taanna aalisartuuvoq piniartuullunilu piffillu ilisimalluarlugu, Nuugaatsiamilu najugallit sakkortuumik eqqugaasut arlallit ilisarisimallutigit. Massakkut qanoq innerluta nassuiaruminaappoq, pisormi eqqarsaatiginngisaannarsimavarput pisinnaanera, Sara Lyberth oqaluttuarpoq.
- Neriuutiginerpaavarput siunissami Illorsuarnut utersinnaanissarput, Sara Lyberth oqarpoq.