Saturday, April 23, 2016 - 10:34

Nunaminerals ukioq ataaseq akilersuiunnaaqqavoq

Nunaminerals ilaatigut Nuup eqqaani Qeqertarsuarmi kuultimik ujaasisimavoq
Assi.: NunaMinerals
Nunamineralsip akilersuinerminik uninngatitsinera pigisanik agguaassisarnermut eqqartuussiviup sivitsoqqippaa

Aatsitassanik ujaasinermik selskabi aningaasaqarnerliortoq Nunaminerals qaammammi tullermi nalliussissaaq ingerlatsiviit ikinnerpaat misigisarsimasaannik: Akilersuinermik ukioq ataaseq uninngatitsineq.

Kalaallit Nunaanni pigisanik agguaassisarnermut eqqartuussiviup apriilip 22-anni eqqartuussinermini aaqqissuussineq tamanna sivitsoqqippaa.

Ulloq nalliussiffik

Akilersuinermik uninngatitsineq maajip 15-iata tungaanut sivitsorneqarpoq, ullorlu taannarpiaavoq aatsitassanik ujaasinermik selskabip akilersuinerminik unitsitsiffia siulleq. Tamannalu peqatigalugu pigisanik agguaassisarnermut eqqartuussiviup akilersuinermik unitsitsineq 11-issaa sivitsorpaa.

Akilersuinermik unitsitsinikkt ingerlatsivik inatsisikkut tunngavissaqalerpoq aningaasatigut tunngavissamik nutaamik pissarsiornissaminut, tamannalu akiligassaqarfiit taperserpaat, saniatigut periarfissatuaammat akiliisinnaajunnaartutut nalunaarutigineqarneq.

Nakkutilliisut akuersipput

Sivitsuinissamik aalajangiineq pivoq selskabip qinnuteqarneratigut, taannalu nakkutilliisutut taaneqartunit ilalerneqarpoq.

Nakkutilliisut tassaapput eqqartuussissuserisoq Søren Aamann Jensen, Københavnimi eqqartuussissuserisutut ingerlatsivimmit Kromann Reumertimeersoq, kiisalu eqqartuussissuserisoq Niels Hansen Damm, Nuummi eqqartuussissuserisutut ingerlatsivimmit Malling og Hansen Damm-imeersoq.

Nakkutilliisut suliassaraat ingerlatamut atatillugu akiligassaqarfiit soqutigisaat isumagissallugit. Taamaattumillu nakkutilliisut selskabimi pingaarutilimmik aalajangiinerit tamaasa akuersissutigissavaat.

 

Seneste nyheder / Nutaarsiassat kingulliit