Pituffik

Pituffimmut qinnuteqarsinnaanerup unitsinneqarallarnissaa Folketingimi amerlanerussuteqartut piumasaraat

Pituffimmut kiffartuussinissamut isumaqatigiissuteqarfigineqarsimasup unitsinneqarallarnissaa danskit partiivisa amerlanerussuteqartut nunanut allanut ministerimut piumasaraat

Pituffimmi kiffartuussinissamut isumaqatigiissuteqarfigineqanngitsut imaassinnaasoq arlaat isumaqatigiissuteqarfigineqarsinnaasoq.

Suliffeqarfiup Excelis A/S-ip isumaqatigiissuteqarfigineqarnera unitsinneqarallarnissaa danskit partiivisa amerlanerussuteqartut nunanut allanut ministerimut Martin Lidegaardimut Radikale Venstremeersumut piumasaqarput.

Finans taamatut allappoq.

- Naalagaaffeqatigiinnermi suleqatigiinnissaq anguniarneqanngilaq nunamit allamit suliffeqarfiutigineqartup kiffartuussinermik isumaqatigiissuteqarfigineratigut. Aalajangiisoqarnissaa sioqqullugu piumasaqaateqarpugut isumaqatigiissutigineqartup unitsinneqarallarnissaa, Venstremit Troels Lund Poulsen Finansimut oqarpoq.

Pituffimmi kiffartuussinissamut suliffeqarfik isumaqatigiissuteqalersumut nunanit allanit pigineqartuunersoq USA-mi silaannakkut sakkutuuisa paasiniaammata danskit nunanut allanut ministeriaqarfiat apeqqutigineqartup akinisissaanut ikiuerusussimanngitsoq Finansimit pingasunngormat allaaserineqarpoq.

Ministerimut allagaqaat
Venstre partiit talerperliit peqatigalugit kiisalu Enhedslisten, Alternativet aamma Inuit Ataqatigiit nunanut allanut ministerimut allagaqaateqarput. Kiffartuussinissamik isumaqatigiissutip USA-mi naalakkersuisuusut peqatigalugit ataatsimiissutigineqartariaqartoq piumasaqarput.

Inuussutissarsiornermut aqutsisoqarfimmut saaffiginninnissaat amerikarmiut innersuunneqarput.

IA: Kukkusoqarnera iluarsineqarsimasinnaagaluartoq
- Pingaartumik maannakkorpiaq suliatsinnut attuumalluinnartuunera pissutigalugu Kalaallit Nunaannut ataatsimiititaliap Pituffimmukarnissaa iluatsimmat nuannaarutigaara. Sivikikkaluarluni pissarsiffiuvoq, ilaatigullu base, nakorsiartarfik aammalu talittarfik takuagut. Ajuusaarnaraluartumilli Pituffiup siunissaanut isumakuluutikka ilumoortut paasivakka. Paasissutissat ilagivaat Greenland Contractorsip Qaanaarmiunut eqqaamiuinullu suliniutaat arlaliusut, soorlu nakorsamit pinasuartumik ikiorserneqarsinnaanermut tunngasoq. Exelicip isumaqatigiissummik tigusineratigut suliniut taanna qatangiinnarsinnaavoq. Pingaartumik Greenland Contractorsip suliatut kivissimasaasa Exelisimit akikinnerujussuarmik isumagineqartussanngorneri eqqarsaatigissagaanni, tusagassiuutinut nalunaarummi Johan Lund Olsen, IA, allappoq.

Kalaallit Nunaannit Danmarkimiilluunniit suliffeqarfiit kiffartuussinissamik isumaqatigiissutigineqartartussaasut isumaqatigiissuteqartoqarpoq 1950-ikkunni.

Suliffeqarfiit Greenland Contractors I/S, Copenhagen Arctic A/S aamma Per Aarsleff A/S qinnuteqaraluarput, itigartinneqarlutilli.

Powered by Labrador CMS