Nunat inoqqaavi New Yorkimi oqallipput
Inuit issittormiut siunnersuisooqatigiiffoat ICC peqataavoq nunat inoqqaavisa permanent forumimi ataatsimeersuarneranni ippassaq aallartittumi
Aqqaneq aappassaa nunat inoqqaavisa FN-mi oqallittarfianni Permanent forumini oqallittoqarpoq ukiormannalu peqataasut 2.000-ngajaapput. Taakku FN-ip New Yorkimi illorsuani maajip 31-ata tungaanut oqallisigissavaat peqqissuunissaq, ilinniartitaaneq, kulturi oqaatsillu.
Inuit issittormiut sinnerlugit ICC peqataavoq suliniaqatigiiffiup nunani tamalaani siulittaasua Aqqaluk Lynge, Hjalmar Dahl aamma Rena Skifte ICC Kalaallit Nunaanniit kiisalu Leanna Ellsworth ICC Canadamiit peqataasoralugit. Ataatsimiinnermi inissat ICCp aamma Samet siunnersuisooqatigiit avitseqatigiissutigaat.
Tusilartut peqataapput
Ataatsimiinneq ippassaq ammarneqarpoq FNip allattuunerata tullersortaanit Sha Zukangimit taannalu FNip allattuunera Ban Ki Moon sinnerlugu ammaasuuvoq.
- Aamma nutaamik peqataapput arnat immikkut naapeqatigiittuni ilaasut Kattie Egede Motzfeldt Aviaaja E. Lyngelu kiisalu Nunatsinni tusilartut peqatigiiffianeersut Jakob aamma Riata Petrussen siullerpaamik alaatsinaattutut peqataasut, ICC nalunaarpoq.
FN-mi nunat inoqqaavisa oqallittarfiat 16-nik ilaasortaqarpoq taakkunanngalu arfineq pingasut nunat inoqqaavisa suliniaqatigiiffiinit toqqagaapput.