Venstre: Kalaallit Nunaat peqataasariaqarpoq

Issittumi nukittuumik suleqatigiinnissamut Issittumi Siunnersuisoqatigiinnut peqataasariaqarpoq, Danmarkimi partiit annersaat oqarpoq

Issittumi nukittuumik suleqatigiinnissamut pisariaqarpoq Issittumi Siunnersuisoqatigiinni peqataanissaq, Venstret Kalaallit Nunaannut oqaaseqartartuat Gitte Lillelund Bech oqarpoq. Ass.: Leiff Josefsen

Venstrenit uggornartinneqarpoq Issittumi Siunnersuisoqatigiit pingasunngormat Sverigemi Kirunami ministerit ataatsimiinneranni Naalakkersuisut siulittaasuat Aleqa Hammond, Siumut, Kalaallit Nunaat sinnerlugu peqataanngimmat.

Venstret Kalaallit Nunaannut oqaaseqartartua Gitte Lillelund Bech Aleqa Hammonditulli nassuiaavoq Kalaallit Nunaata mattussinera pissuteqarpoq Sverigep nunatut ataatsimiititsisutut kissaatiginngimmagu naalagaaffeqatigiinni immikkoortut pingasut tamarmik Issittumi Siunnersuisoqatigiit ataatsimiinnerini sinniisuutitaqartarnissaat.

- Tamanna uggornarpoq, pissutigalugu siunnersuisoqatigiit manna tikillugu ingerlalluarsimammata issittumilu innuttaasunut oqaloqatiginnittarfiusimammat pitsaasoq, Gitte Lillelund Bech oqarpoq.

Periusaasarsimavoq naalagaaffeqatigiit ataatsimiinnerni peqataasarlutik Danmarkimit, Kalaallit Nunaannit Savalimmiunillu sinniisoqarlutik. Svenskilli ukiuni marlunni siulittaasuuneranni periuseq allanngortinneqarsimavoq, taamaasilluni naalagaaffeqatigiit isumaqatigiinniarnerni ataasiinnarmik sinniisuutitaqarlutik.

Issittumi Siunnersuisoqatigiinni ministerit ataatsimiinnerannik Kalaallit Nunaata mattussinera pillugu Sermitsiaq.AG-p allaaserisai tamaasa atuakkit uani

Gitte Lillelund Bechip erseqqissarpaa pingaarutilinnik aalajangiisoqassagaangat, assersuutigalugu silap pissusianut atatillugu, tamatigut pisariaqartartoq tunngaveqarluarnissaq. Taamaattumik aamma ernumanartoqarpoq tamaani ajornartorsiutinik paasisimasallit ilisimasallillu, siusinnerusukkut peqataasarsimasut, Issittumi Siunnersuisoqatigiit ataaatsimiinneranni peqataasinnaajunnaarmata, ilisimasaminnik siunnersuutinillu ikiuuteqartaallutik.

- Neriuppunga sukkanerpaamik aaqqiissummik, kikkunnut tamanut naammaginartumik nassaartoqarumaartoq, taamaasilluni Danmarki, Kalaallit Nunaat Savalimmiullu tamarmik immikkut isumaqatigiinniaqataalersinnaallutik taamaasillutillu Issittumi Siunnersuisoqatigiinni sulinermi peqataanermi assigiilluinnartumik periarfissaqalerlutik, Venstret Kalaallit Nunaannut oqaaseqartartuat oqarpoq.

Svenskit: Danmarkip nammineq pisuussutigaa
Svenskit Issittumi Siunnersuisoqatigiinni siulittaasuunerannik isornartorsiuineq Kalaallillu Nunaata ministerit ataatsimiinnerannik mattussinera svenskit nunanut allanut ministeriata Carl Bildtip akerlilerpaa. Tamannami naalagaaffeqatigiit iluanni apeqqutaavoq, taanna oqarpoq.

Issittumi Siunnersuisoqatigiinni ministerit ataatsimiinnerannik Kalaallit Nunaata mattussinera pillugu Sermitsiaq.AG-p allaaserisai tamaasa atuakkit uani

Powered by Labrador CMS