WWF: Issittumi Siunnersuisoqatigiit paamaarussipput

Isumaqatigiissutit pingasunngormat Issittumi Siunnersuisoqatigiit atsiugaat Verdensnaturfondenip kakkaginngilai

- Pakatsinarpoq Issittumi Siunnersuisoqatigiit uuliaarluernermut silallu pissusiata allanngoriartorneranut piareersimanissaq sukkanerusumik iliuuseqarfiginianngimmassuk, WWF Verdensnaturfonden isumaqarpoq. Polfoto/Mriam Dalsgaard

- Pakatsinarpoq sammisassaqarfinnut nukingernartunut, soorlu uuliaarluernissamut silallu pissusiata allanngoriartorneranut piareersimanissamut, akissutissarsiorlutik Issittumi Siunnersuisoqatigiit sukkanerusumik sulinngimmata.

Taamatut oqarpoq WWF-ip issittumut pilersaarutaanut pisortaq Alexander Shestakov.

Taamatut oqarpoq pingasunngormat Issittumi Siunnersuisoqatigiinni ministerit Sverigep avannaani Kirunami ataatsimiinnerisa kingorna.

- Siunnersuisoqatigiit ajornartorsiutit isiginngitsuusaavissimanngilaat, naammattumilli pingaartinneqanngillat. Issittumi allanngoriartornerit ima sukkatigaat ukiuni marlunni uninngatitsigallarnissamut piffissaraqarani, Alexander Shestakov nangilluni oqarpoq.

Issittumi Siunnersuisoqatigiinni ministerit ataatsimiinnerannik Kalaallit Nunaata mattissineranik Sermitsiaq.AG-p allaaserisai tamaasa uani atuakkit

Issittumi Siunnersuisoqatigiit isumaqatigiissumik tunngavilimmik sulipput, tassa imaappoq, naalagaaffik sunaluunniit siunnersuummut mattussisinnaavoq. Ruslandimi inuit kattuffiat Arctic Athabaskan Council malillugu black carbon-imik (paamik) aniatitsinerup qanoq iliuuseqarfiginissaanik isumaqatigiissuteqarnissaq Ruslandip mattussimavaa. Aniatitsineq tamanna, Issittumi silap pissusiata allanngoriartorneranut annertuumik sunniulitik.

Aamma nersualaarlugit
WWF Verdensnaturfondenili malillugu Siunnersuisoqatigiit aamma sammisaqarfinni allani pitsaasumik alloriarsimapput.

Issittumi uumassuseqarnermut ulorianartorsiortitsisut silap pissusianik pissutillit qanoq iliuuseqarfigineqarnissaannik inassuteqaatit ministerit akuersissutigaat qulakkeerlugulu inassuteqaatit tamakkua kingusinnerusukkut malitseqartinneqarumaartut.

Aamma Issittumi umiarsuarnik assartuinermi malittarisassat sakkortusineqarnissaannik FN-imi isumaqatigiissut nukittorsarsimavaat aammalu uuliaarluernermi isumaqatigiissut atsiorsimallugu.

- Issittumi Siunnersuisoqatigiinni ataavartumik alaatsinaatsutut isumaqatigiissutip ilusilersornerani WWF-ip naalagaaffiit ilaasortaasut suleqatigisimavai - WWF-illu arajutsisaanniarpaa isumaqatigiissutip kissaatigineqartutut sunniuteqarnissaa, verdensnaturfondenimit tusagassiorfinnut nalunaarummi allassimavoq.

Greenpeace annertuumik isorinnippoq
Ulloq taanna siusinnerusukkut aamma Greenpeace isornartorsiuivoq. Nunani tamalaani avatangiisinik illersuiniaqatigiiffik sakkortunerusumik isornartorsiuivoq.

- Pakatsinarpoq Danmarkimit issittumilu nunanit allanit anguniakkat ima annikitsigimmata, upalungaarsimanissamut piumasaqaammik piviusumik ataasinnguamilluunniit piumasaqaateqartoqarani. Tamanna peqatigalugu nunat taamaallaat namminneq piumasaminnik ikiuuttassammata ima tasisuaartigisumik iliortoqarpoq, nunarsuarmi avatangiisini sunnertianerpaat ilaanni pinngortitap illersorneqarnissaa qanilleriarsimanatigu, Greenpeace Norden-imi issittumut akisussaasoq Jon Burgwald allaaserisami "Uuliaarluernermut isumaqatigiissut Greenpeacep upippaa"-mi ilaatigut allappoq.

Powered by Labrador CMS