Mianersoqqussut: Riskiksit kræfteqalissutaasinnaapput
Meeqqat mamarilluagaat riskiksit aamma Nunatsinni tunisaalluartartut kræfteqalissutaasinnaasut, inuussutissat pillugit Danmarkimi aqutsisoqarfik nalunaarpoq
Meerarpassuit riskiksimik tigumisserneqartarput taamalu pisariitsunnguamik tumannguersaasertarlutik. Riskiksilli amerlavallaat nerigaanni peqqinnissamut ulorianarsinnaasoq inuussutissalerinermut aqutsisoqarfik nalunaarpoq.
Inuussutissalerinermut aqutsisoqarfiup inassutigaa meeqqat riskiksinik risdrikinillu atuissanngitsut. Qaqorteqqasulli akuisa ilaat arsen kræfteqalissutaasinnaasoq paasineqarpoq.
Nunatsinni mianersorput
- Imaappoq inuit ukiorpassuit ingerlaneranni ullut tamaasa arsenitalimmik nerisartut kræfteqalersinnaanerat ilimanarnerulersarpoq. Meeqqat mikisut eqqarsaatigalugit mianersorluinnartariaqarpoq timaasa oqimaassusaannut sanilliullugu nerisaat annertusarmata, inuussutissalerinermut aqutsisoqarfik nalunaarpoq.
Nunatsinni pisiniarfeqarfiutillit maanna misissorpaat inuussutissalerinermut aqutsisoqarfiup inassutaa qanoq iliuuseqarfigissanerlugu.
- Inuussutissalerinermut aqutsisoqarfiup nalunaarutaa misissulerparput tamannalu pereerpat qanoq iliornissarput paasinarsiumaarpoq, Kalaallit Nunaanni Brugsenimi pisortaq Susanne Christensen Sermitsiaq.AG-mut oqarpoq.
Riskiksit aamma Pilersuisumi tunisaalluartarput. Taakku aamma maanna qanoq iliornissartik misissorpaat.