Sverigep takkutinnginnermut Danmark pisuutippaa
Sverigemi nunanut allanut ministerip Issittumi Siunnersuisoqatigiinni siulittaasuunermut isornartorsiuineq kalaallillu ministerit ataatsimiinneranni peqataannginnerat naapertuussorinngilaa. Tamanna naalagaaffeqatigiinnerup iluani suliassaavoq oqarpoq
Naalakkersuisut siulittaasuata Aleqa Hammondip Siumumeersup nunatsinni tusagassiorfiit nalunaarfigai pingasunngornermi Sverigemi Issittumi Siunnersuisoqatigiinni ministerit ataatsimiinnerannut takkutinnginnissaminik aalajangernini Canadamik tatisinernermi peqquteqartoq taamaalillutik kalaallit savalimmiormiullu Issittumi Siunnersuisoqatigiit ataatsimiinneranni Danmark peqatigalugu isumaqatigiiniartuniisinnaaqqilerlutik.
Tamannalu pisimavoq Sverigemiut Issittumi Siunnersuisoqatigiinni siulittaasuuffeqarnerminni Aleqa Hammond naapertorlugu 'Issittumi Siunnersuisooqatigiit ataatsimiinneranni kalaallit savalimmiormiullu peqataasinnaanerat killilerujussuarmik paasinninneq atorneqalersimammat, taamaalilluni Issittumi Siunnersuisoqatigiinni Danmarkip, nunatta Savalimmiullu periaaserisimasaat allanngortinneqarluni'.
Taamatulli sakkortuumik isornartorsiorneqarneq sverige nunanut allanut ministerip Cal Bildtip naapertuutinnginnerarpaa. Isumaqarpoq tamanna qallunaat naalagaaffeqatigiinnerisa iluani kukkunerusoq Issittumi Siunnersuisoqatigiinniunngitsoq.
Læs her alle Sermitsiaq.AG’s artikler om Grønlands boykot af ministermødet i Arktisk Råd
Qallunaat kalaallillu suliassaat
- Apeqqut qallunaanut tunngavoq. Danmarkimik ismaqatigiissuteqarpugut siusinnerusukkut aaqqiissimanermut naapertuuttumik. Pisorlu kalaallit iluanni inissisimanermik aallaaveqarsimassaaq, Carl Bildt KNR-imut oqarpoq.
Aperineqarami Sverigemiut pingasunngormat ministerit ataatsimiinneranni Sverigemiut kalaallit avataaniitinniarsimagai Sverigemiit nunanut allanut ministeri KNR-imut oqarpoq:
- Naagga. Ilisimaneqartutuut Danmark isumaqatigiissuteqarfigisarparput. Danmarkip iluani Danmarkillu Nuullu akornanni pisut uagut susassarinngilagut. Qallunaat kalaallillu akornanni suliassaavoq. Maannakkullu kalaallit nutaamik naalakkersuisoqalerput, immaqalu suliat taassuminnga sunnerneqarsimassapput, Carl Bildt oqarpoq.
Læs her alle Sermitsiaq.AG’s artikler om Grønlands boykot af ministermødet i Arktisk Råd