Naalakkersuisut: Taamaattumik ministerit ataatsimiinnissaannut peqataassanngilagut
Kalaallit Nunaat sinnerlugu misigisimanarpoq Issittumi Siunnersuisooqatigiit svenskinit siulittaaffigineqarnerannit peqataatinneqannginneq. Taamaattumik Naalakkersuisut pingasunngornermi ministerit ataatsimiinneranni peqataatitaqassanngillat
Kalaallit Nunaata Issittumi Siunnersuisooqatigiinnik taamaatitsinngikkaluarlutik Sverigemi Kirunami ministerit pingasunngornermi ataatsimiinnissaanni peqataajumannginnerat Issittumi Siunnersuisoqatigiinni svenskit siulittaasoqarfimmik tigummineranni aalajangiussaannut sakkortuumik qisuariarneruvoq.
- Issittumi Siunnersuisooqatigiinni suleqataaneq Naalakkersuisunit pingaartinneqartorujussuuvoq taamaattumik assut ajuusaarnarpoq taamannak aalajangiisariaqarnerput, namminersorluni oqartussani Siulittaasup Naalakkersuisoqarfianit siusinnerusukkut tutsiuppoq.
- Kalaallit Nunaat aamma Danmark Issittumi Siunnersuisooqatigiit pilersinniarneqarmata annertuumik isumaqataasimapput aamma 1996-imi pilersitsiniaanermik suliaqaqataalluinnarlutik. Naalagaaffeqatigiinni suliamik avitseqatigiinnermi pissusissamisoorpoq Kalaallit Nunaat salliunera, tulliulluni Danmark taavalu Savalimmiormiut. Tassunga soorunami Kalaallit Nunaata sumiiffia aallaaviuvoq aamma Kalaallit Nunaata Danmarkillu Canada peqatigalugu siornatigut Issittumi pinngortitamik suliniutip (AEPS) ineriartorteqqinnissaanut tunngassuteqarluni issittormiut inuit peqataatinneqarnissaannik aallaavilik. Nunap immikkoortui pingasut taamaattumik Issittumi Siunnersuisooqatigiinnik pilersitsinerup kingorna soorunami ataatsimeeqataasarput (siullermik Danmark aamma Kalaallit Nunaat kingornalu Savalimmiut ilanngulluni).
- Sverigep Issittumi Siunnersuisooqatigiinnik siulittaasuuffimmik tigumminermini (2011-2013) Kalaallit Nunaata aamma Savalimmiut Issittumi Siunnersuisooqatigiinni isumaqatigiinniarnerni peqataasinnaanerat millisinneqarpoq, tamaalilluni Danmarkip, Kalaallit Nunaata aamma Savalimmiut Issittumi Siunnersuisooqatigiinni sinniisuutitaqarnerat allanngortinneqarluni. Sverigep siulittaasuunermini aaqqissuussinera nutaaq Kunngeqarfiup Danmarkip Issittumi Siunnersuisooqatigiinni pitsaasumik suleqataanissaanut akornusiivoq. Sammisaq arlaleriarluni Danmarkimit aamma Kalaallit Nunaannit Sverigep siulittaasuunerata nalaani saqqummiunneqartaraluarpoq, Siulittaasup naalakkersuisoqarfianit nalunaarutigineqarpoq.
Kalaallit Nunaata inissisimanera allanngortikkumanngikkaat
Naalakkersuisoqarfimmit ilisimatitsissutigineqarpoq pingaaruteqarmat Kalaallit Nunaannit kissaatigineqanngimmat Kalaallit Nunaata inissisimanerata allanngortinneqarnissaa imaluunniit Issittumi Siunnersuisooqatigiinni suleriutsip allanngortinneqarnissaa, taamaallaallu kissaatigineqarluni Sverigep siulittaasuunera sioqqullugu Issittumi Siunnersuisooqatigiinni ileqqup ingerlateqqinneqalernissaa.
Naalakkersuisut marlunngornermi aalajangernerisigut Canadamiut siulittaasuuffimmik tigusinissaannut nutaamik isumaqatigiinniarnerit aallartipput, taamaaliornikkut qulakkeerniarneqarluni siunissami Kalaallit Nunaata Issittumi Siunnersuisooqatigiinni naammaginartumik suleqataasinnaalernissaa.
Sverigep Issittumi Siunnersuisooqatigiinni siulittaasuuffimmik tigumminera naggataarlugu pingasunngornermi siunnersuisooqatigiit Sverigemi Kirunami ataatsimiipput. Tassani Issittumi Siunnersuisooqatigiinni siulittaasoqarfik Sverigemit Canadamut tunniunneqassaaq.
Sermitsiaq.AG Naalakkersuisut siulittaasuannik Aleqa Hammondimik oqaaseqartitsiniarpoq.