Atuisoq: Kukkunerit ingasanngillat
Kamik CenterMarked, Nuummi Qapiarfiusaamiittoq Atuisumit orninneqarpoq Sermitsiaq.AG-mit pisinniarfiup nioqqutaasa pisoqalivallaarnikut allaaserineqarnerisa kingorna
Sermitsiaq.AGp ataasinngornermi ullaakkut Nuummi Qapiarfiusaami Kamik Centermarkedip nioqqutaasa ilaat pisoqaavallaartut allaaserineqaarnerisa kingorna, Atuisoq pisinniarfimmik nakkutilliiartorluni ornigussimavoq.
- Nioqqutit ilaat pisoqalivallaartut naammattoorpavut taamaattoqartarnerali nalinginnaavoq. Kukkunikkut taamannak pisoqartoortarpoq. Tamatumuuna isumaqarpugut kukkunerit ingasagisassaanngitsut, Malene Lynge Atuisumit Nuuk TV-mut oqarpoq.
TV-qarfik naapertorlugu Kamiup ilumoornerarpaa nioqqutissanit pisoqalivallaarsimasunit assilisat Qapiarfiusaami pisinniarfimminngaanneersut. Oqarlunili assit quersuarmi assilineqarsimasut. Kamimmit erseqqissaatigineqarpoq nioqqutissani ullut allanneqarsimasut, Kamik naapertorlugu tamanna isumaqarpoq nioqqutissat iginneqartussaasut pisinniarfimmilu tuniniarneqaratik.
Nioqqutissat pisoqaavallaat tuniniarneqartarnerannik paasissutissanik Sermitsiaq.AG-mut nassitsisup Kamiup qerititsiveqarfianit assinik ilanngussaqarpoq aamma pissutsit Nunatsinni uumasuuteqarnermik inuussutissanullu oqartussaaffimmut nassiussimallugit.
Atuisut nalunaarfigineqarsimanini ilumoornerarpaa.