Kalaallit filmiliaannik taasigit
Aviisi ullormut saqqummersartoq Politiken novembarimiilli unammisitsivoq kina timelapsemik videoliamik kusanarnerpaamik sanasinnaanersoq. Kalaallit sanaavi tallimat finalimut anngussinnaapput
Politikenip quppernerani nittartakkami unammisitsinermi, 2012-imi novembarimiilli ingerlasumi, Kalaallit Nunaat pitsaasumik sammineqarpoq.
Unamminermi tassani kajumissaarutigineqarpoq timelapsimik videoliamik kusanarnerpaamik nassiussinissamut - nassiussinissamullu piffissarititaq maanna naammat kalaallit filmiliaat tallimat finalimut anngussinnaapput. Politiken-illu sie-mini kajumissaarutigaa Kalaallit Nunaannut kusanartumik angalanissaq:
- Kalaallit Nunaanni atuartartoqarpaaloqarsimagunarpugut avannaanilu qeqertarujussuarmit filminik tallimanik tigusaqarsimavugut, taamaattumik takanna - filmiliat kusanartut takukki, eqqaamallugulu taasinissat, Politiken kajumissaarivoq.
Time lapsimik videoliaq tassaavoq filmiliaaraq assinik ataasiakkaanik arlalinnik sanaaq.
Videoliani taakkunani tallimani ilaatigut takutinneqarput nunatta silaa, arsarnerit aamma Arctic Circle Race. Videoliat ilaat "Poorskimi arsarnerit" sananeqarsimavoq Toke Brødsgaardimit, taannalu ilaanneeriarluni Sermisiaq.AG-p nittartagaanut assinik allaaserisanillu ilanngussisarpoq.
Toke Brødsgaard nassuiaavoq videoliani assinik ataasiakkaanik 1.000-t missarpiaannik sanaajusoq, assiliissummik sekundit arfinillit missaanni matusartumik.
- Time lapsimik videoliami suut takutinneqarsinnaapput piffissap ingerlanerani allanngorartut, imaluunniit suut nalinginnaasumik videoliornermi immiunneqarsinnaanngitsut, qaamaneq allalluunniit pissutigalugit. Assersuutigalugu taamaappoq arsarnerit, tamakkua assilineranni videoliuutit qaamanermik sakkortoorujussuarmik filmiliorsinnaasut atorneqartariaqarmata, Toke Brødsgaard oqarpoq.
Kalaallit sanaavi linki una atorlugu takusinnaavatit - tassanilu aamma videolianik kusanarnerpaanik taaseqataasinnaavutit.