PPK: Qimusseq uppippoq!
Peqqinnissaqarfimmi anguniakkanik politikerit oqalunnerat tusarninngilaq, pingaartumik pissutigalugu anguniagaat pissusiviusunut ataqatigiinngilluinnarmata, PPK-p siulittaasua isumaqarpoq
- Peqqinnissaqarfimmi sulisut nukitik tamaasa atorlugit qimusseq uniarpaat. Tamaviaaqaallu! Sulisut tamakkua amerlanerusunik suliassinnerisigut artukkerneqarnerunissaat ersissutigiinnarsinnaavara, tamannalu peqatigalugu telefoninut akeqanngitsunut akissaqarniarluni sipaarniuteqartoqarlunilu annikillisaasoqarpat qimusseq uppissaaq.
Taamatut allappoq Inuuti Fleischer, Peqqinnissaq Pillugu Kattuffimmi - PPK-mi - siulittaasoq. Tamanna pivoq Naalakkersuisut peqqinnissaqarfimmut anguniakkaminnik saqqummiussereersut. Anguniakkat Qilaliarfik sioqqullugu pingasunngormat saqqummiunneqarput peqqissutsimut Naalakkersuisumit Steen Lyngemit, Atassut.
Anguniakkallu Inuuti Fleischerip ileqimisaartuutigai.
Tassami naalakkersuisooqatigiinnissamik isumaqatigiissummi allassimavoq Naalakkersuisut kissaatigigaat peqqissaavinnut akeqanngitsumik sianertoqarsinnaassasoq, Inuuti Fleischer allappoq, ilanngullugu sanilliullugu Aleqa Hammondip ukiunut tuliuttunut qulinut anguniagai, tassa peqqinnissaqarfik ukiumut 30 millioner koruuninik sipaarniuteqartassasoq.
- Ilanngullugulu katsorsaanermi suliassat amerlanerusut Danmarkimit Kalaallit Nunaannut nuunneqassapput, Steen Lynge Qanoruumi apersorneqarluni oqarpoq.
- Takujuminaatsittorujussuuvara nunatsinni peqqinnissaqarfimmut anguniakkat siuliani pineqartut pingasut, tamarmik qaammatit aappaata affaata kingulliup ingerlanerani saqqummiunneqartut, qanoq ataqatigiissinneqarsinnaanersut. Kiammi akilissavai, Inuuti Fleischer aperivoq, ilanngullugulu paaserusuppaa sammisaqarfiit suut annikillisaaffigineqassanersut.
- Eqqaamassavarpummi Namminersorlutik Oqartussanut isumaqatigiissummi qallunaat ataatsimut tapiissutaat aalaakkaatinneqarmata, taamaattumik sammisaqarfinnik tigusineq amerlanerusunik atugassaqarnermik kinguneqarunnaarpoq. Taamaattumik annertunerusumik suliniuteqartoqassappat pitsanngorsaasoqassaaq, imaluunniit allatigut annikillisaasoqassalluni. Kiap akilissavai, Inuuti Fleischer oqarpoq, peqqinnissaqarfimmilu anguniakkat pissusiviusullu pillugit politikerit oqaloqatigerusuppai.