Folkets Arktis-imut politikerit takkutinngillat

Issittumi pinngortitap innarlerneqannginnissaa Greenpeacep sammitippaa. Taanna ippassaq unnukkut Kirunami siusinaartumik aallartisarneqarpoq, tassani Issittumit tamarmit oqaluttuatoqqat aliikkusersuutigineqarlutik

Pingasunngorpat Artisk Rådip Kirunami ataatsimiinnissaa sioqqullugu Greenpeace ulluni tulliuttuni marlunni ataatsimeersuartitsissaaq Issittumi aatsitassarsiornermut atatillugu nunat inuiisa piginnaatitaaffii pillugit. Assimi saamerlerniit tivasartoq Canadameersut Kiera Kolsen Greenpeacellu generalsekretæria Kumi Naidoo, Nigeriameersoq, tivasartorlu Hivshu Robert Peary. Ass.: Arktis Media

Greenpeacep ataatsimeersuartitsinera "Folkets Arktis", ullumi sapaammi ammarneqartussaq ullunillu marlunnik sivisussuseqartussaq, tallimanngormat unnukkut siusinaartumik aallartisarneqarpoq tivanermik, oqaluttuatoqqanik oqalualaanillu kiisalu issittumit oqaluttuanik. Inuit katillugit 70-it peqataapput, amerlanerpaat nunat inuvii Canadameersut, Alaskameersut, Ruslandimeersut, Kalaallit Nunaanneersut, Sverigemeersut Norgemeersullu.

- Issittoq malunnartumik allanngoriartorpoq. Nunarsuup kiatsikkiartornera ilutigalugu immap sikua manna tikillugu takuneqarsimanngitsumik sukkassusilimmik aakkiartorpoq. Tamanna pippat sumiiffiit manna tikillugu innarlerneqarsimanngitsut atorneqalissapput uuliasiornermi, aatsitassarsiornermi aalisarnermilu, tamakkualu tamarmik issittumi uumassuseqarnermut nalissaqanngitsumut nunallu inuiisa inuuniarnermi atugarisaannik issittullu avannarpasissuani pisinnaatitaaffiinik ulorianartorsiortitsissapput, Greenpeace allappoq.

Kirunami ataatsimeersuarnermi sammineqarpoq suliffissualersuineq Issittumilu nunap inuiinut kinguneqaatissat. Greenpeacep generalsekretæria Sydafrikameersoq takkussimavoq aammalu Nigeriamit saqqummiussisoq takkussimalluni.

Nunatsinnit peqataasoqanngilaq
Nunatsinnit qaaqqusat arlallit ullualunnguanik sioqqutsillutik peqataaniaratik nalunaarsimapput. Tamakkua tassaapput Inatsisartunut Folketingimullu ilaasortaq Doris Jakobsen, Siumut, Inatsisartunut ilaasortaq Naaja Nathanielsen, Aqqaluk Lynge, ICC aamma Anders Meilvang, Transparency Grønland.

Peqataajumannginnerat paasiuminaatsippaa

- Inuit isumaqatiginngikkaluarlugit nipangersinneqaannassanngillat, isumaat tusarniarneqassapput, oqalugiartoq Peary isumaqarpoq, taassumalu katersorsimasut kalaallit inuunermik isiginnittariaasitoqaannik oqaluttuuppai. Suliassani tamani illua'tungeriit tamarmik tusaaniarneqassapput, Naalakkersuisut aamma KNAPK kattuffiillu allat naalakkersuisunut attuumassuteqanngitsut nipangersinniassavaat? Paasisinnaanngilara sooq kalaallit politikerit sinniisuinik takkuttoqanngimmat, Hivshu Robert Peary oqarpoq.

Kalaallit Nunaanni peqataasutuaapput Piitanngilaq Tittusen, Nuup Kangerluata Ikinngutaaneersoq, Avatameersorlu Mikkel Myrup kiisalu oqalugiartoq tivasartorlu Hivshu Robert Peary, ullumikkut Sverigemi najugalik.

Ataatsimeersuarneq Greenpeacemit Ruslandimeersumillu Save the Pechora-komite-mit ataatsimoorluni aaqqissuunneqarpoq.

Greenpeacep neriuutigaa Issittumi nunat inuvii peqatigalugit uuliasiorneq pillugu ataatsimut nalunaarusiorsinnaassalluni. Nalunaarut pingasunngorpat Arktis Rådip Kirunami ataatsimiinnerani tunniunneqassaaq.

Powered by Labrador CMS