Naalakkersuisoqatigiit: Uranimut akuersaannginneq atorunnaarsinneqassaaq

Aggusti nallertinnagu Naalakkersuisut tamanut saqqummiutissavaat naalakkersuisoqatigiit uranimut politikkiat pillugu qaqugu innuttaasunik ataatsimiititsisoqassanersoq

Narsami innuttaasut Kuannersuit pillugit uranimillu piiaanerup kinguneqaatai pillugit ataatsimiitinneqaqqissapput. Ass.: Leiff Josefsen

- Erseqqivissumik erseqqissartigu Kalaallit Nunaat pilersaaruteqanngimmat uranimik piiaanissamik imaluunniit uranimik piiaaffinnik pilersitsinissamik. Urani assersuutigalugu aatsitassanik qaqutigoortunik piiaanermi saniatigut tunisassiaavoq. Aatsitassiorfinnik aallartitsissagutta pisariaqarpoq akuersaannginnerup atorunnaarsinneqarnissaa.

Taamatut Sermitsiaq.AG normu 16-imut oqarpoq oqarpoq Naalakkersuisut siulittaasuat Aleqa Hammond.

Taamatullu oqarneq Sara Olsvigip paragraf 37 naapertorlugu apeqqummini itisileqquvaa, isumaqarami imminut akerliusoq siullermik naaggaariarluni aappassaanik ingerlaannavik akuersineq.

Ilaatigut apeqqutigaa piiaaffimmik suliniutini suni akuersaannginneq Naalakkersuisut atorunnarsinniarneraat, akineqarlunilu Kuannersuit sumiiffiit ilagigaat uranimut akuersaannginnerup atorunnaarsinneqarnissaanut, inatsisillu allannguutissaanik inatsisissatut siunnersuuteqartoqassasoq 2013-imi ukiakkut ataatsimiinnermi.

- Kuannersuit maanna ujaasinermik ingerlatsiviuvoq ima siuarsimatigisoq, suliniut ingerlaqqissinnaanani akuersaannginneq allanngortinneqanngippat, akissummi allassimavoq, tassanilu aamma neriorsuutigineqarpoq aggusti nallertinnagu Naalakkersuisut tamanut saqqummiutissagaat qaqugu aatsitassanik suliniutit pillugit innuttaasunik paasissutissiilluni ataatsimiititsisoqartarumaartoq.

Uranili piiarneqartoq qanoq pineqassanersoq ersarippallaanngilaq. Naalakkersuisut akissumminni nassuiaatigaat Inngili Qernertoq saniatigut tunisassiaqartoq nalilimmik, tassalu sølvimik.

Powered by Labrador CMS