Atlantikup avannaa ataatsimoorluni imminut nittarsaattariaqarpoq
Atorsinnaanngilaq atlantikup avannaani nunat tamarmik immikkut nittarsaannerat, takornarianik ussassaarinerminni
Pingasunngornermiilli Kalaallit Nunaat qeqertallu sumunngarfiillu tallimat, New Foundlandimiit Norgemut, umiarsuarnik takornariartaatinik umiarsuaatileqatigiiffiit USA-meersut Europameersullu nalissaqanngissutsiminnik oqaluttuuppaat, Reykjavikimi tusarnaartitsisarfimmi kusanartumi ataatsimeersuartarfimmilu Harpa-mi. Tamanna pivoq Cruise North Atlantic Symposium-imut atatillugu, tassani, Visit Greenlandip aaqqissoqataaffigisimasaani, 75-it sinnerlugit peqataallutik.
Ataatsimeersuarnermi sammineqarput nunarsuup avannaani ataatsimut oqaluttuarisaanerput, aammattaarli assigiinngissutivut, siunertaralugu umiarsuaatileqatigiiffinnut suli amerlanerusunut nittarsaanissaq pilerilersitsinissarlu, pingaartumillu sumunngarfinnut aaqqissuussisunut umiarsuarnik takornariartaatinik takornarianut aningaasaateqarluartunut, aaqqissuusseqataasut tassaallutik - Kalaallit Nunaata saniatigut - Canada, Island, Savalimmiut, Orkney aamma Norgep kitaa.
- Kalaallit Nunaat, Atlantikup avannaani qeqertat sumunngarfiillu allat assigalugit, piginnaasaqarpoq suli naammassineqarsimanngitsunik, tamatumunngali sallersaatillugu pisariaqarpoq nunat qanimut suleqatigiinnissaat, assersuutigalugu branding-imi tunisassiallu ineriartortinnerannik, Visit Greenlandimi siulersuisunut ilaasortaq aaqqissuussinermilu saqqummiussisoq Ole Andersen oqarpoq.
- Sallersaatilluguli Kalaallit Nunaanni illoqarfiit nunaqarfiillu tunisassiatik pitsanngoriangaatsiarsinnaavaat imminnut pitsaanerusumik ataqatigiissarnermikkut, taamaasilluni takornariartaatinik umiarsuaatileqatigiiffiit ilaasuilu Kalaallit Nunaannut pigaangamik sapinngisamik pitsaanerpaanik misigisaqarsinnaaqqullugit, taamaasillunilu aamma aningaasat sapinngisamik amerlanerpaat atorneqarsinnaaniassammata, taanna oqarpoq.
Suleqatigiittoqartariaqarneralu - aamma nunat killeqarfii akimorlugit - aamma umiarsuaatileqatigiit aallartitaasa arlallit erseqqissaatigaat.
- Ilaasartuvut Atlantikup avannaani nunanut ilisimasakitsuararsuupput taamaasillunilu naatsorsuutigisaat annikitsuararsuullutik, akerlianilli atuisartunik naammagisimaarinnilluartunik pissarsissaasi, takornariat nunarsi tikeraarpassuk, nunarsuarmi umiarsuaatileqatigiiffiit annersaasa ilaata sinniisua amerikarmiu saqqummiussinermini oqarpoq nangillunilu:
- Ataatsimoorlusi nunarsuup immikkoortuatut ataatsitut nittartaattariaqarpusi, immikkuinnaq pinnasi.
Umiarsuarnut takornariartaatinut nittarsaassineq aningaasatigut tapiiffigineqarsimavoq NORA-mit, NATA-mit aamma Nordregio-mit, tamakkualu tapiissuteqarsimanngikkaluarpata aaqqissuussineq ingerlanneqarsinnaassanngikkaluarpoq. Kalaallit Nunaannit peqataapput Edda Lyberth, Kommune Kujallermit, Nauja Lyberth, Bluewater Shippingimit, Gorm Diernesse, Royal Arctic Logistics-imit kiisalu Anders la Cour Vahl aamma Malik Milfeldt, Visit Greenlandimit.