Inuili ilusinikkiartortoq
Ukiuni arlalinni utaqqisaareerluni kiisami inuussutissalerinermut ilinniarfiup Inuilip allissutissaa suliarineqalerpoq
Pingasunngornermi Permagreenimit sulisut Narsami Inuilip immikkoortortassaanik nutaamik qalialiisinnaalerput kingorna sanaartukkami allat ikkussuunneqassallutik.
Sanaartorneq tamarmi ukioq manna apriilimi naammassineqartussaagaluarpoq, Islandimiulli sanaartortut akiliisinnaajunnaarmata suliap decembarimi 2014 naammassineqarnissaa kinguartinneqarpoq, tassa ukiut marluk avillugit kinguaattoorluni.
Ilassutissat marluk saniatigut maannakkut illorsuup qiterliusup qaava ilaneqassaaq tamatuma saniatigut init arlallit nutarterneqassapput ilaatigut igaffiit.
Tassunga tunngatillugu Inuilimi pisortaq Poul Christensen oqaluttuarpoq Permagreenip sulisui pisortaanillu suleqateqarneq nuannaarutigalugu.
Pinngitsoorneqarsinnaanngilaq atuartut atuarnerisa nalaani sulisartut illumut isaaqattaarlutik piiaallutillu iluarsaasineri pissutigalugit assortuunnerit atuummata.
Kisianni atuarfiup pisortaasa aamma sulisitsisut ittuata akulikitsumik ataatsimiittarnerisigut akornutit ikilisinneqarsinnaasimapput kikkullu tamarmik imminnut ataqqeqatigiillutik.