NATO Issittumi annermik peqataatitaqassanngilaq
NATOp generalsekretæria Anders Fogh Rasmussen oqarpoq suleqatigiit Issittumi annertusaanissaminnik pilersaaruteqanngitsut
Nunat arlallit ilaatigut Rusland, Canada aamma USA, nalunaaruteqareerput Issittumi sakkutuunik amerlanernik inissiissamaarlutik. Assersuutigalugu soorlu Norgep erseqqissaatigereeraa avannarpiarsuani piginnaatitaaffimminnik sorsuutiginninnissaq pingaartittorujussuullugu.
Taamakkaluartoq Issittumi peqataanerunissaq Natomit suliniutigineqanngilaq.
Tamanna erseqqissivoq Norgemi ataatsimoorussamik tusagassiivinnik katersortitsisoqarmat, Natomi generalsekretæri Anders Fogh Rasmussen aamma Norgemi statsministeri Jens Stoltenberg ataatsimiimmata, ilaatigut Nato aamma Europæiske Union Norgemut tunngatillugit oqaluuserineqarlutik.
Issittumi immap naqqata ataani naatsorsuutigineqarpoq uulia nappartat 90 milliardit aamma nunarsuup gassimik isumalluutaasa 30 procentiat pissarsiarineqarsinnaasut.
- Norgemi, nunanut suleqatigiinnut assingusumik tunngavissaqarluni naatsorsuutigineqarsinnaavoq, Natomit ataatsimoorussamik illersornissamik isumaginnittussaanermi sumiiffiit tamagiit isumagineqartussaasut, ilanngullugu soorunami aamma Norgep avannaa. Kisianni Natomit tamaani sakkuttuut amerlineqarnavianngillat, Anders Fogh Rasmussen ilaatigut nittartakkakkut nutaarsiassaqartitsivimmut b92.com oqarpoq.