Kiisami Ninimut neriuutissaqalerpoq
Nini Tessingip timaata ipiusartaanut assingusut kiisami nakorsanit nassaarineqarput sapaatip-akunnerisa marluk pingasulluunniit ingerlaneranni patinik peqqissunik Nini ikkussiffigineqassaaq, Sara Tessingip arnaa eqqissiallassimaqisoq unnersiorpoq
Marlunngornermi ilaqutariit Tessingikkut oqaloqatiserineqarlutik aggersarneqarput. Utaqqisarfimmi nipaanneq kisimi tusarsaasoq Nini nakorsat tusarliussassaat ernummatigalugu qissaserpoq. Sara Tessing oqaluttuarpoq, taanna kræftimik napparsimasumut 22-nik ukiulimmut anaanaavoq.
Nakorsat marloriarlutik oqaatigeqqaartariaqarpaat Ninip sananeqaataanut assingusumik sananeqaatilimmik nassaarsimallutik sapaatillu akunneri marluk pingasulluunniit ingerlaneranni patimik peqqissumik Nini Tessingip timaanut ikkussisoqassasoq.
- Pisoq oqaluttuassaanngilaq. Oqiliallaqaanga. Aatsaat ullumi paasivara timinni nukiit tamarmik sukattooqasimasut. Piffissaq sorsuffigisutulli ikkakkat neriuuteqartuaannarlutali. Maannakkut nukissatsinnik tunineqarpugut, Sara Tessing eqqissiallassimaqisoq Sermitsiaq.AG-mut oqaluttuarpoq.
Qangali kingullermik nuannisaramik aatsaat taamak nuannisaqatigiitsigipput
- Ippassaq unnukkut nakorsanit tusarlerneqarnitta kingorna ilaqutariinnguulluta kiisami eqqissisimaaqatigiippugut. Nuannisarluta sivisoorujussuarmi taamannak misigisaqaqatigiissimanata, Sara Tessing oqaluttuarpoq, taanna siullermik Rigshospitaliliaqqaarpoq decembarimi 2010.
Nini Tessing mannakkut peqqissarneqassaaq aavata kisitsisitai qaffassarniarlugit patermik ikkussiffigitinnissaannut piareersaatitut.
Timip sananeqaatai tulluartut qalatsiminngaanneersuupput nunarsuaq tamakkerlugu paternik allattuivik Bone Marrow Donors Worldwide aqqutigalugu nassaarineqarsimasut.
Katersiniarneq tuppallernartoq
Facebook aqqutigalugu Nini Tessing taassumalu ilaqutai katersuunneqarput. Kingullertut kalaallit nipilersortartut Small Time Giants katersuiniarlutik tusarnaartitsipput.
Katersat katillutik 90.000 koruuniupput.
- Inuit taamak pitsaasaartigineri tuppallernartorujussuuvoq. Ninimik uagutsinnullu ilaqutariinnik tapersersuisut tamaasa qujassutissaqarfigeqaakka, Sara Tessing oqarpoq.
Sermitsiaq.AG-mi Nini Tessing pillugu allaaserisat tamarmik uaniipput.