Vittus Q.: Maliina, peqqissaartumik ingerlatsigatta

- Aningaasaqarnermut nunamullu namminermut naalakkersuisoqarfimmi peqqissaartumik ulapittoqarpoq, Vittus Qujaukitsoq, aningaasaqarnermut naalakkersuisoq nassuiaavoq

Aningaasaqarnermut Nunamullu namminermut Naalakkersuisut for finanser og indenrigsanliggender Vittus Qujaukitsoq, Siumut, allakkatigut ammasukkut Maliina Abelsenimik inissiivoq. Assimiippoq Nunamut namminermut, pinngortitamut avatangiisinullu naalakkersuisuusimasoq Anthon Frederiksen, Kattusseqatigiit Partiiat naalakkersuisut paarlaannerannit assilisaq. Assi: Leiff Josefsen

- Peqqissaarpugut.

Taamak allappoq aningaasaqarnermut nunamullu namminermut naalakkersuisoq Vittus Qujaukitsoq, Siumut.

Maliina Abelsenimut, IA-meersumut ammasunik allappoq, taassuma tusagassiorfiit aqqutigalugit Naalakkersuisut nutaat qineqqusaarutiminnik neriorsuinerlunnerarlugit pisuutippai, tamatuma saniatigut naalakkersuisooqatigiinnermik isumaqatigiissummik apeqqusiilluni Kalaallit Nunaata aningaasaqarneranik anguniakkanik.

Aamma atuaruk: Naalakkersuisooqatigiit qineqqusaarutitik qimarratigaat

- Naalakkersuisut akisussaassusilimmik aningaasaqarnikkut politikkimik ingerlatsiniarput, Aningaasaqarnermut Nunamullu Namminermut Naalakkersuisoq Vittus Qujaukitsoq Inatsisartuni ilaasortap Maliina Abelsenip Naalakkersuisut siuliisa politikkiannik maannakkut Naalakkersuisuusut nangitsinerarlugit oqaaseqarneranut akissuteqarluni oqarpoq.

Taassuma erseqqissaatigaa Naalakkersuisuusimasut aningaasaqarnermut politikkiminnik tamakkiisumik ukiakkut 2012 saqqummiussimmata, ukiuni pingasuni atuutsereerlutik.

- Naalakkersuisut siusinnerusukkut oqaatigereerpaat, Naalakkersuisut Akileraartarnermut Atugarissaarnermullu Ataatsimiititaliarsuup angusai akuerineqartut, kisianni tamanna imaanngilaq, Naalakkersuisut ataatsimiititaliarsuup inassuteqaatai tamaasa malillugit naammassiniaraat. Naalakkersuisut siullermik inassuteqaatit peqqissaartumik misissussavaat tamatumalu kingorna inassuteqaatit politikkikkut piviusunngortinneqarsinnaanersut isummerfigissallugit.

- Naalakkersuisut aningaasaqarnikkut politikkianni titarnerit siulliit takuneqarsinnaalissapput ukiumoortumik Aningaasaqarnikkut Ingerlatsineq pillugu Nalunaarutip saqqummiunneqarneranut atasumik, nalunaarummilu tassani siunissami aningaasarsiornikkut suliassat pingaaruteqartussat qulaajarneqassapput kiisalu 2014-imut aningaasaqarnermut inatsisissatut siunnersuummi takuneqarsinnaassaallutik. Taakkua aggustimi 2013-imi tamanut saqqummiunneqassapput. Siunissaq ungasinnerusoq isigalugu aningaasanut inatsisit ataatsimoortumik aningaasaqarnikkut politikkimik tunngaveqassapput, taakkualu anguniakkanik iliuusissanillu siunissaq ungasinnerusoq isigalugu aningaasaqarnermik attanneqarsinnaasumik siunissamilu atugarissaarnermik qulakkeerisumik imaqassapput, Aningaasaqarnermut Nunamullu Namminermut Naalakkersuisoq Vittus Qujaukitsoq naggasiivoq.

Powered by Labrador CMS