Inuttassarsiuisartut KNRimi pisortassarsiueqataapput
KNR-mi pisortanngortussaq atorninninnissamut juulip qaammataani atsiorsimassagatinneqarpoq
Atorfinnut piukkunnartunik ujarlertartut Odgers Berndtson KNRip siulersuisuinut sullissillutik pisortanngortussamik ujarleqataapput. Inuttassarsiuilluni allagassiussaq qanittumi saqqummiunneqassaaq pisortanngortussallu qanoq ittuunissaa allaaserineqareerpoq.
Qallunaat piukkunnartunik ujarlertartut KNRimi siulersuisut aamma sulisut ilaat isumasiorsimavaat paasiniarlugu pisortanngortussap qanoq ittuunissaanik qanoq kissaateqartoqarnersoq.
Tamarmik naligiipput
- Naatsorsuutigaarput uani sapaatip akunnerani imaluunnit sapaatip akunnerata tulliata aallartilaarnerani inuttassarsiuilluni allagarsiussaq saqqummiussinnaajumaarlugu. Inuttassarsiuinermi siulersuisut iluanni ataatsimiititaliaqarpq taakkulu siullersuisunut inassuteqartussaapput.
Kisianni tassa qinnuteqartut tamarmik assigiimmik nalilersuiffigineqarumaarput, KNR-mi siulersuisut siulittaasuat Hans Peter Poulsen Sermitsiaq.AG-mut oqarpoq.
Atuaruk: Ivalo Egede KNR-imiikkunnaarpoq
Ivalo Egede KNRimi pisortatut februaarip naalernerani nammineq kissaateqarnermigut tunuarpoq. Maannalu qaammatini marlunngortuni inuttassarsiuilluni suli allagarsiisoqanngilaq.
- Piukkunnartunik ujarlertartut suleqatigalugit allaaseriniarsimavarput pisortanngortussap qanoq piginnaasaqartuunissaa. Taamaammat inuttassarsiuineq massakkut aatsaat saqqummiunneqartussanngorpoq. Pisortanngortussat isumaqatigiissusiorfiginera juulip qaammataani pisinnaassasoq naatsorsuutigaarput, kisianni suli naluarput qaqugu atorfittaassaminut ivertinneqarsinnaajumaarnersoq, Hans Peter Poulsen oqarpoq.