Qallunaat aviisiat: Qangali isummiussat ilaat taamaaginnartarput
Kalaallit Nunaannit tusagassiiniarluni angalareernerup kingorna Ekstra Bladet pingaarnertut allaaserisami allappoq, Kalaallit Nunaat pillugu siummut isummiussat aviisip qallunaallu pigisaat piviusunik tunngavissaqanngitsut
’Grønland i opbrud’qulequtsiullugu Ekstra Blademi pingaarnertut allaaserisami Kalaallit Nunaat kalaallillu qaqutigoortumik annakkuumminartumilli allaaserineqarput.
Arfininngormat aviisimi saqqummersumi sammisami ilanngunneqartumi allaaserisat ilaatigut makkuupput: ’Koloni-Danmarks sorte kapital: Født som tabubørn’, ’Jeg blev min fars gave’, ’Åbenhed efterlyses’ aamma ’Vi savner egne rollemodeller’, allaaserisami kingullertut taasami tusagassiortoq Maren-Louise Poulsen allattuuvoq.
Ekstra Bladep Kalaallit Nunaat pillugu quppernernik 40-nik allaaserisaanni pingaarnertut allaaserisap naggasernerani silap pissusaata allanngoriartornera aamma ilanngunneqarpoq:
'Kalaallit Nunaanni sorsutassat amerlaqaat. Kisianni aamma Kalaallit Nunaanni sorsuutigisassat amerlagamik.
Aatsitassaannaannginnamik.
Naalagaaffeqatigiit immikkoortuisa avannarlersaanni inunnit isumalluutit amerlaqaat.
Paasisassarsiorluta angalanitsinni kangianit kimmut, kujataaniillu avannamut inussiarnisaarnermik annertuumik, ilassiorermik aamma nunagisamik oqaluttuarusussusermik naapitsivugut, inuttaasuisa misilittagartuut tulluusimaarutigisaannik. Nuna inuiaallu uagut qallunaat tupinnaannartumik annikitsumik ilisimasaqarfigisavut.
Taamaattumik nuna taanna pillugu siummut isummiussatsinnik arlalinnik peqarfigaarput.
Ilaat ilumoortuugunartut paasivarput pissutigalugu inunnut atugassarititaasut aamma kulturikkut assigiinngissutit suli annertoqaat, allarpassuilli allanngortitassaanngitsumik siumut isummiussaallutik.
Paarlattuanik Danmark aamma qallunaat sumi tamaniittut pitsaanerpaamik takutitsisarsimanngillat. Tamanna uppernarsaatissaqarpoq. Ilaat quppernerni makkunani nunasiaateqarsimanerup qernertuinnarmik assiliartaqarluni kingunipiluusut erserpoq, ukiorpassuarni inatsisitigut ataataqanngitsut inuttut pisinnaatitaaffiinik sumiginnaasimanerup aqqqanik.
Kalaallit Nunaanni sapaatip akunneri marlussuit tikeraarnitsinnit suut tamaasa ilisimalersimallugit takorluunngilarput kisianni maannakkut pisut uagut isiginnittaaserput naapertorlugu allaaseriniarsimavagut. Neriuppugut ilinnik tupaallatsitsisinnaalluta illit uagutsituulli nunamik taamak pinnertigisumik tassanilu innuttaasunik nuannarinninnerulaarniassagavit', pingaarnertut allaaserisami allassimavoq.