MIO: Meeqqat eqqaamallugit!
Sullivimmi avatangiisit pitsaasut peqqinnartullu inersimasunut pingaaruteqarput. Sullivimmili avatangiisit eqqartorneqartillugit meeqqat puigorneqarajuttarput. Meeqqat aamma sullivimmi avatangiisinik peqqinnartunik pisariaqartitsipput
Sullivimmi avatangiisit inersimasuinnaq atuutinngillat. Init, meeqqat ulluunerani najortagaat puigorneqarajuttarput, sullivimmi avatangiisit peqqinnartut eqqartorneqartillugit.
Tamatut isumaqarpoq Meeqqat Illersuisuat Aaja Chemnitz Larsen, MIO, taannalu isumaqarpoq meeraaqqeriviit, meeqqeriviit, atuarfiit, efterskolit, fritidshjemmit klubbillu pisortat nakkutilliinermik pisussaaffiinut pissusissamisoortutut ilaatinneqassasut.
- Tamassuma sammitinneratigut ajornartorsiutit, inuunermi kingusinnerusukkut pilersinnaasut, pinngitsoortissinnaavagut, Aaja Chemnitz Larsen oqarpoq.
- Uagut inersimasut akulerutsissavagut tusaaniarlugillu. Tamanna Meeqqanut isumaqatigiissummi immikkoortut pingaarutillit ilagaat, Aaja Chemnitz Larsen oqarpoq, taannalu isumaaqarpoq meeqqanut sullivimmi avatangiisit ajorluinnartut.
Kingullermik MIO ilulissani atuarfiit ilaanni pissutsit ernumanartinneqartut pillugit saaffigineqarsimavoq, tassani meeqqat oqummik asbestimillu atugaqartinneqarmata.
- Atuarfippassuit pisoqalisimapput, arlallillu asbest atorneqartarallarmat sananeqarsimallutik. Tamatuma saniatigut takusimavagut atuarfiit, kollegiat atuartullu najugaqarfii aserfallassimaqisut paarinerlutaallutillu. Aamma atuarfeqarpoq oqoqalernissaanik silaannalunnissaannillu annertuumik ulorianartorsiortunik. Taamaattumik pingaaruteqarpoq ajornartorsiutit tamakkua pimoorunneqarnissaat, Aaja Chemnitz Larsen oqarpoq, taassumalu pissutsit napparsimalersitsisinnaasut sammineqaqquvai, soorlu oquk, asbest, klassit suertarnerat imaluunniit silaannarissarneqartannginnerat, kiisalu nipiliornerit qinngasaarinerillu.