Blok 17-imi pisimasumi pingasut unnerluunneqarput
Angutip 26-nik ukiullip blok 17-imi altanimit avammut igeriunneqarnerata kingorna qaammatit 11-t qaangiuttut unnerluussisut unnerluussinissaminnut maanna piareerput
Blok 17-imi pisimasumik taaneqartumi eqqartuussinissaq siulleq qaqugu pissasoq Nuummi eqqartuussiviup aalajangerpaa. Radioaviisi, knr.gl, malillugu tamanna pissaaq Nuummi Eqqartuussivimmi maajip 24-anni nalunaaqutaq 9.
Toqutsinermi paasiniaaneq ukioq ataasingajammik sivisussuseqarsimavoq.
Aamma atuaruk: Takunnittoq: Quleriit 5-annit avammut igitaavoq
Siorna juunip 20-anni angut 26-inik ukiulik toqungasoq nassaarineqarpoq, Nuummi blok 17-imi altanimit igeriunneqarnermi kingorna. Politiit aallaqqaammut inuit tallimat, 26-nik ukiullip najugaaniittut, tigusaraat. Taakkua 16-iniit 32-nut ukioqarsimapput.
Kingorna angutit marluk iperagaapput, allagarlu unnerluussut malillugu angutinit taakkunannga tallimanit pingasut 26-nik ukiulimmik toqutsisimasutut unnerluutigineqassapput.
KNR-p oqaatiginngilaa eqqartuussinermut ullut qassit atorneqassanersut. Akerlianik angutit pingasut, pisimasumi unnerluutigineqartut, radioaviisip aqqi taavai.