Immap naqqatigut kabelip ajutoornera akornutigissanngilat
Canadap avataani immap naqqatigut kabelip ajutoornera Nunatsinni internettimik atuinermut kiisalu Kalaallit Nunaata avataatalu akornanni attaveqarnermut ajoqutaassanngilaq, taamatut paaissutissiivoq Tele-Post
Tallimanngormat unnuakkut nalunaaqutaq 01.30 Tele-Postip paasivaa Kalaallit Nunaata Canadallu akornanni Greenland Connectimik immap naqqatigut kabelimik attavik ajoquteqartoq.
- Misissuigallarnitsigut ilimanarpoq ajoquteqarneq pissuteqarpoq Nuup Canadamilu Miltonip akornanni kabelikkut attaveqaat kipisimasoq, Tele-Postimi teknikkimi pisortaagallartoq Kim Schwartz oqaluttuarpoq.
- Peqqissaarnerusumik uuttortaanerput malillugu attaveqarnikkut kipisoorneq pisimasoq Miltonimi nunami stationimit 166 kilometerinik aamma 263 kilometerinik avasissusilimmi pisimasoq, taanna itisiliivoq.
Kipisoornermut pissutaasoq maannangaaq ilisimaneqanngilaq, tusagassiorfinnut nalunaarummi allassimavoq.
-Ajoquserneq Nunatsinni nunap iluani internettikkut atuinermut kiisalu Kalaallit Nunaannit avammullu attaveqarnermut akornutaassanngitsoq, tassa immap naqqatigut attaveqarneq tamarmi Islandikkoortumik pisarmat, Telep teknikkikkut pisortaa oqarpoq.
Ajutoornikkut nunani tamalaani atuisartut eqqorneqassapput, Greenland Connect atorlugu Islandip Canadallu akornanni attavilinnut.
Ajutoorneq pisimavoq immap qaavanit 253 meterit 324 meterillu akornanni itissusilimmi.