Aatsitassanut ilisimasaqarfik nutaaq
Geus ilisimasaqarfimmik ammaapput nunarsuarmi aatsitassaqarfiit sumiinnerannik ikiorsiisinnaasoq
Nunarsuatsinni aatsitassanik isumalluutinik piumasut suli amerliartorput.
Pingasunngornermi Københavnimi Videnscenter for Mineralske Råstoffer og Materialer siullermeerluni matuminik ammaavoq.
Videnscenteri, Mima-mik naalisarneqartoq, paasiniarneqassapput, inuiaqatigiit naalagaaffeqatigiinnilu ingerlatsiviitsuliassaqarfiit allat siunissami aatsitassanik amigaateqalissanersut.
Ilisimasanik katersivik nutaaq De Nationale Geologiske Undersøgelser for Danmark og Grønland, Geus-imit pilersinneqarpoq.
- Ilisimasanik katersivimmit Geusip ilisimatusarnikkut paasisaat aamma aatsitassat pillugit piginnaasai tunngavigineqarput suliamut tunngasunik ilisimasallit allat ilanngunneqarsinnaallutik. Aatsitassanik pilersuineq pillugu ilisimasat kiisalu amigaateqarsinnaanernik ajornartorsiutit qallunaat kalaallillu pisortaannut, aalajangiisartuinut, ingerlatsiviutaannut NGO-inullu iluaqqutaassasut, tusagassiivinnut nalunaarummi erserpoq.
Nunarsuaq tamakkerlugu aatsitassat isiginiarneqartut
Nunarsuarmi isumalluutit aamma aatsitassat suli piumaneqaleraluttuinnarput innuttaasut amerliartornerat pissutigalugu aamma akunnattumik aningaasarsiallit amerliartuinnartut atuisunik millionilikkuutaanik nassataqarnerat aallaavigalugu.
- Mimap suliassaasa ilagaat aatsitassanik akilersinnaasumik imminullu napatissinnaasumik piiaasoqarnissaa, piffissami silap pissusaata allanngoriartorneranit aamma atortussat amigaataanerannik oqallinnerup annertunerpaaffiani, klima-, energi- og bygningsminister Martin Lidegaard, Radikale Venstre, oqarpoq.