Nuummioq millioninnattoq
Eqquisup iluanaartup eqqukkani ilaatigut Grønlandsbankimi piginneqataassutinik aquuteralammillu pisissutiginiarpai, oqaluttuarpoq
1.165.861 koruunit.
Nuummioq kinaanerminik isertuusserusuttoq taama pisuunnguallatsigaaq.
Danske Spilimi bingomi eqqugassat annerpaartaannik eqqueqqammerpoq.
Danske Spilimi Bingo-Jackpotit annersaat eqquiniaasartut ulluni kingullerni arlalissuarni eqqorniarsimavaat. Unnuarlu aningaasarpassuit kiisami inuttassaqalerput.
- Nuannaaqaanga, Bingomi eqquisoq 'lakaelsa68'-mik atequsilik illarpoq.
- Kammalaatinnit kaffillerfigisannit pulaarneqaqqammerpunga eqquiniaqataaneralu unitsinnialerlugu. Isumaqaqqaaraluarpunga 800 koruuninik eqquisimallunga - nuannaarutigalugulu. Taavali Jackpotimik eqquisimanera qarasaasiakkut saqqummerpoq, Danske Spilimut oqaluttuarpoq.
Ullumi suliartortoq
Angut 40-kkunnik ukiulik aterminik saqqummiusserusunngilaq, Nuumminngaanneersuuninili oqaluttuaralugu.
- Ataatannit umiatsiatoqqamik tunineqarsimavunga, taannali nutaamik aquuteralalerneqartussaavoq. Aningaasat ilaat tassunga atorneqassapput. Taava aamma Grønlandsbankenimi piginneqataassutinik pisiniarpunga. Tamanna qularnaakannersimassaaq, Bingortartoq oqaluttuarpoq.
Millionærinngoraluarluni ullumi pisarnermisut suliartorpoq.
- Ullup-qeqqanut suliartussaanga. Kisianni ulluinnaanngilaq. Nuannaartorujussuullungalu qasusorujussuuvunga. Unnuaq sininngitsuungajassimavunga, oqaluttuarpoq.
Danske Spilimi Bingomi eqqukkat maannamut annersaat 609.847,50 koruuniusimapput, taakkuali pingasunngornerup unnuani kalaallimit angummit 40-kkunnik ukiulimmit Nuummeersumit qaangerneqarput.