'Containerit' inisseeqqinnissaq qulakkiissavaat
Namminersorlutik oqartussat sanaartugassanik katitiinnarianik nunatsinni pissutsinut naleqquttunik ineriartortitsisimapput, namminersorlutik oqartussat inissiaataasa iluarsaanneranni inissiiffiugallartutut atorneqassapput
Inissiat 'containerit' sisamat 'Trusselyp' tunuani Noorliit aamma Saqqarliit akornanni sananeqarlutik naammassingajalerput.
Inissiat 'containerinik' taassallugit immaqa naleqqutinngikkaluarpoq, kisi anni katitertakkanik sanaartorneq pineqarpoq, sanaartorneqartut Royal Arctic Linep containerinik angallassinermi uuttuutaannut naapertuuttussaapput.
Inissiat inissiiffigineqarallartussatut atorneqassapput namminersorlutik oqartus sat inissiaataasa pisoqqat iluarsaanneranni ilaqutariinnit najugarineqartassallutik. Katitigassanik sanaartugaq siulleq maannakkut naammassingajalersoq misiligu taagallassaaq najugaqarfigineqarsinnaappallu namminersorlutik oqartussanit pilersaarutigineqarpoq inissianik taamaattunik amerlanernik pissarsinissaq, namminersorlutik oqartussat illoqarfinni nutarteriffiusussatut pilersaaruteqarfiu suni inissiigallarfissatut atugassaasut. Taamak Nuuk Ugeavisimut ilisimatitsivoq, Ineqarnermut, Pinngortitamut, Avatangiisinut aamma Nunanut Avannarlernut Suleqatigiinnermut Pisortaqarfimmi pisortaagallartoq Olafur P. Nielsen.
Inissiaagallartussanik atuisussat siulliit tassaapput Qapiarfiusaami inissiani uiguleriiaanik iluarsartuussanilu najugallit ilaqutariit sisamat, Olafur oqarpoq.
Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk: