Maaji Nuanimi utoqqaat peqataallaquaat
Maajip qaammataani peqqinnartumik inuuneq illoqarfinni nunaqarfinnilu malunnartinniarneqassaaq. Nuummi Maaji Nuanimik aaqqissuisut utoqqaat peqataanerunissaat kissaatigaat
Maaji Nuanimik ammaanersiortussat Nuummi sila nalaarluaqaat maajimmi aallaqqaataa qaavoq seqinnerluni kialaarlunilu. Taamaammat ammaanersiorluni nalunaaqutaq 18.00 arpannissamut sila piukkunnarluavippoq.
Maaji Nuan siorna ingerlanneqarmat aaqqissuussinerit 230-it 240-ullu akornanniittut naammassineqarput ukiormannalu pisussat 115-it missaa ullorsiutinut inississorneqareerput.
- Kisianni ullorsiutivut nutartertuartuupput pisussallu nutaa ilanngutiinnariaallutik. Taamaammat naatsorsuutigaarput siorna pisut amerlaqataat missaliorlugu aaqqissuisoqarumaartoq, Maaji Nuanimi aaqqissuisuniit Katrine Andersen Sermitsiaq.AG- ut oqarpoq.
Utoqqaat karatertut
Maaji Nuanimi ussangarfigineqarluartussaq tassaavoq peqqisumik inuuneqarnissamut siunnersuisartoq Chris MacDonald nalunaaqutaq pingasunut peqqissuuneq timigissartarnerlu pillugu oqalugiartussaq.
Taanna aamma ammaanersiorluni arpataasussanut qiimmassaareerpat 5 kilometerimut arpanneq aallartinneqassaaq tassanilu peqataasut nammineq aalajangissavaat arpakkusunnerlutik, pisukkusunnerlutik, sikkilerusunnerlutik imaluunnit løbehjulerusunnerlutik.
Atuaruk: Peqqissuunissamik siunnersuisartup Nunarput isumassarsiorfigaa
Pisussanut pilersaarut Maaji Nuanip nittartagaani takuneqarsinnaavoq aaqqissuisullu neriuutigaat utoqqaat ukiormanna peqataalluarumaartut.
- Uagutsinnut pingaarnerunngilaq peqataasut qanoq amerlatiginerat pisussalli naammassinerat pingaarnerulluni. Aamma neriuutigeqaarput pisussani assigiinngitsuni utoqqaat peqataalluarumaartut, Katrine Andersen oqarpoq.
Ukiormanna misilinneqarsinnaasut nutaat ilagaat utoqqasaanut 50-leereersimasunut karate karatertartut klubbiat suleqatigalugu pisussaq.