Suliniutinut angisuunut inatsit naammagittaalliutigineqaqqittoq
Nunani avannarlerni sulinermik inuussutissarsiutillit kattuffiisa ataatsimoorussamik kattuffiata suliniutinut angisuunut inatsit oqallisaaqisoq, oqaaseqaasiorlutik isornartorsiorpaat
- Tupinnaqaaq Kalaallit Nunaata suliniutinut angisuunut inatsimmik akuersinermigut inatsimmi maanna atuutsiligaani sanaartornermi pilersitsiniaanermilu nunani avannarlerni suleqatigiinnissamik aaqqissuussinermi ileqqussaasunik pingaarutilinnik amigaatilimmik akuersaarsimanerat, suliffissaqartitsisussat nammineq aningaasarsiassanik isumaqatigiinniarsinnaatitaamata aamma ataatsimut isumaqatigiissusiorluni atugassarititaasunik aaqqiisinnaammata, tamakkua tassaagaluartut nunani avannarlerni suliffeqarfinnik aaqqissuussinermik pingaartinneqarnerpaat.
Taamak SIK-mi siulittaasoq Jess G. Berthelsen naammagittaalliropoq Den Nordiske Faglige Samarbejdsorganisation, NFS-imik naalisarneqartartoq sinnerlugu.
NFS tassaavoq Norgemi, Sverigemi, Finlandimi, Danmarkimi, Islandimi, Savalimmiuni aamma Kalaallit Nununaanni sulinermik inuussutissarsiutillit 9 millionit ataatsimut kattuffissuaraat.
- Aaqqissuussineq taanna ajutuussappat aaqqissuussaaneq tamarmi isasuussaaq. Taamannak aaqqissuussinikkut naligiimmik ingerlatsisoqarnissaa anguniarneqarpoq, NFS ataatsimoorussamik oqaaseqaammi allappoq nangillunilu:
- Ajornartorsiut angisoorujussuussaaq nunanit allanit ingerlatsiviit kalaallit aatsitassarsiorneranni aningaasaleeqataanissamik pilersaaruteqartut, kalaallit ataatsimoorussamik isumaqatigiissutaanik ulorianartorsiortitsisinnaappata ilanngullugu isumaqarunik, ineqarnermut nerisaqarnermut kiisalu sulisut angalanerinut aningaasartuutit aningaasarsianit ilanngaatigineqartassappata.
Ajornartorsiut aaqqinniarneqartariaqarpoq
- Nunani avannarlerni naalakkersuisut - kalaallit naalakkersuisuisa aamma - paasisariaqarpaat qanoq pingaaruteqartigisoq suleqatigiinnermik ileqqutsinnik paaqqinninnissarput ineriartortitsinissarpullu tassungalu ilanngullugu suliffeqarfinnik suli pitsanngorsaajuarneq kiisalu unammilleqatigiinnerup suli nukittorsartariaqarnera, NFS-imit tutsiuppoq, taakkua Ilulissani Hotel Arcticimi katersuupput, SIK ukioq manna qaaqqusisoralugu.
Jess G. Berthelsenip SIK-mit aamma NFS-imit oqariartuut imaattoq apuppaa:
- Maannangaaq ajornartorsiutinik aniguinialinngikkutta, suli aatsitassanut inatsimmi allanngortitsitsisinnaatilluta aaqqiinngikkutta kingunipiluusinnaasut ajoraluartumik suusut naluagut.