Asiip qinersinermi kukkuneq tupassutigaa

Borgmesterip Asii Chemnitz Narupip ukioq manna kommuninut qinersinermi Kommuneqarfik Sermersuumi allakkatigut taasinerit 41-t tammarnerat soorunami tulluussimaarutiginngilaa

- Allakkatigut taasinerit 41-t tammarsimanerat allaffeqarfimmit tusarlugu tupannaqaaq, Kommuneqarfik Sermersuumi borgmesteri Asii Chemnitz Narup oqarpoq. Foto: Leiff Josefsen

- Allakkatigut taasinerit 41-t tammarsimanerat allaffeqarfimmit tusarlugu tupannaqaaq.

Taama naatsumik tusagassiorfinnut nalunaarummi Kommuneqarfik Sermersuumi borgmesteri Asii Chemnitz Narup oqarpoq.

Tamanna pivoq Nuummi innuttaasunik kiffartuussivimmi apriilip 25-ani allakkatigut taasinerit nassaarineqarmata, kukkunikkut qinersisitsisumut tunniunneqanngitsoorsimasut taamaalillutillu apriilip aappaani kommunalbestyrelsemut ilagiillu sinniisaannut qinersinermi kisitsinermut ilaanatik.

Læs "Valgbrøler: Brevstemmer er gået tabt"

Kommuneqarfik Sermersuumi pisortaanerugallartoq Stine Johansen oqarpoq, 'tamanna ajuusaarnarluinnartoq, akunnitsinnilu misissuineq erngerluta aallartillutigu tassani paasinbiarlugu allakkatigut taasinerit qanoq ilillutik takkorliorneqarsimanersut'.

Aamma apriilip 3-ani 2001-imi kommunalbestyrelsemut qinersinermi taamatukanneq allakkatigut taasinerit 27-t puigorneqarput.

Sermitsiaq.AG-mit Asii Chemnitz Narup paasiniaaffigigaluarparput allakkatigut taasinerni kukkusoqaqqinnera qanoq igineraa, kukkoqqittoqannginnissaanullu qanoq iliulersaarnersoq. Aaqqissuisoqarfimmit paasitinneqarpugut borgmesteri sisamat tungaanut kommunalbestyrlsemi ataatsimiittoq.

Ukioq manna qinersinermi allakkatigut taasinerit qinersinerup inerneranik allannguisussaanngillat, Kommuneqarfik Sermersuumilu qinersinermik aqutsisut tamanna pillugu ilisimatinneqarput.

Powered by Labrador CMS