Peqqissuunissamut siunnersuisartup Nunarput isumassarsiorfigaa
Chris MacDonald ullumi ataasinngormi Nuummut tikippoq Katuami oqalugiassalluni aamma Maaji Nuanimi peqataassalluni
Facebookimi ikinnguterpassuaqarneq imaanngilaq ilumoortumik ikinnguterpassuaqarneq. Immitsinnut mattullutalusooq pivugut qamuuna peqqippiarunnaarsimalluta qarasaasiakkut allaqatigiinneq kiinarsilluni oqaloqatigiinnermit atornerulerismallugu. Tamakku ilaatigut oqariartuutigalugit Chris MacDonald kulturip illorsuani Katuami pingasunngorneq maajip aallaqaataani oqalugiarniarpoq.
Kitaamiorpaluttumik inooriaaseq Nunatsinni suli malunnarsiartorpoq qanga ileqqut soorlu erinarsorneq, qitinneq allatigullu ataatsimuualaarnerit X-factorimut alikkutassianullu allanut imissutigineqarsimallutik. Tamanna pissutigalugu eqqarsaatit oqimaaqatigiikkunnaarlutik puullaaqineq atugaalersimasimavoq peqqissuunissamut siunnersuisartoq Chris MacDonald isumaqarpoq.
Arpannermiit pisunneq iluarneruvoq
Taanna ullumi ataasinngornermi Nuummut tikipput Nunarput alianaasseruttortoq aammalu Kangerlussuarmiit Nuummut timmisartornermini pinngortitarsuaq qimerloorsinnaasimallugu. Ingerlaarnermilu pinngortitap isumassarsiorfigineqarsinnaaneranik eqqarsaatersornissamut aamma piffissaqarsimavoq.
- Kalaallit Nunaanni isorartussutsit annertoorujussuupput taamaammallu arpalluni allamukarnissaq imminut akilersinnaanani. Isumatusaarnerussaq pisuinnaraanni. Aammami pisuinnarnissamut naleqqussagaaneruvugut. Aamma isumaga malillugu pisuinnarneq timigissaatit pitsaanersaraat, Chris MacDonald DR-ip aallakaatitaani U-turnimi piffissami matumani tusarsaasoq oqarpoq. Aallakaatitani taakkunani qamuuna peqqissuunissaq pingaartinneqarluni sammineqarpoq.
Inuit amerlanerujartuinnartut sukkornermik, uummalluutinillu nappaateqarput inuppassuillu qamuuna peqqissuunissaq anguniarlugu iisartagalersorneqarput. Inuunerinnerunissamulli iisartakkat kisimik aqqutissaanngillat.
Qarasaasiaq qamillugu ikinngutitaarit
- Inoqatinut attaveqarsinnaanerput qamuuna peqqissuunissatsinnut pingaarutilerujussuuvoq. Inuppassuillu ulapitsitaanermut angummanniapiluuginnaq inuupput inoqatinut toqqaannartumik attaveqarneq qarasaasiakkuunnerusoq ingerlatilersimallugu. Qamuuna oqimaaqatigiikkunnaarneq pisarpoq ulloq puullaaqiuarnermi ullullu ingerlanerani angumerisassat tamakkersimanngikkaanni aqaguani suli angummanniapiloornerusoqartarluni, inuit ilaasa aliasuttunngornerannik kinguneqarsinnaasartut pillugit taama oqarpoq.
Taamalu oqareerluni timmisartornini isorartussutsillu uterfigai.
- Ullumikkut ulapinnarnerpaamik inuuneqarpugut. Kisianni angusaqarnerussaagut arpakkunnaarluta pisukkutta tassani aamma eqqarsarluarnerunissamut periarfissaqarnerussaagut, Chris MacDonald Maaji Nuan ammarlugu Katuap silataaniit nalunaaqutaq 18.00 arpannermi peqataassamaartoq taama oqarpoq.