Paamiuni nuannaarput

Imarsiornermik ilinniarfiup Paamiuniiginnarnissaanik aalajangerneq sulisut eqqissiallaatigaat. Inuussutissarsiornermut siunnersuisooqatigiit inerisaaqqinnissamut isumaliutersuuteqalereerput

Imarsiornermik Ilinniarfiup Paamiuniit nuunnissaa oqallisaalermat toqqissisimannginneqarsimavoq. Ilaatigut akerliussutsimik takutsitsisoqarpoq. Assi.: Anja P. Weiss

Imarsiornermik Ilinniarfimmi Paamiuniittumi sulisut suliffissaaruteratarsinnaanertik isumakuluutigisimavaat Naalakkersuisut siuliisa ilinniarfiup nuunnissaa eqqartulermassuk. Maanna ilinniartitaanermut Naalakkersuisoq Nick Nielsen, Siumut, Paamiuneereerpoq ilinniarfiup Paamiuniiginnarnissaa qujasaatigiartorlugu.

Atuaruk: Aalisarnermik piniarnermillu ilinniarfik Paamiuniiginnassaaq

- Ilinniarfiup nuunneqarnissaa Naalakkersuisut siuliisa eqqartulermassuk silaannaq nillersimavoq. Ilinniarfiup Paamiuniiginnarnissaata nalunaarutigineqarnerata kingorna sulisut akornanni eqqissiallanneq assut malunnarpoq, Imarsiornermik Ilinniarfimmi Paamiuni pisortaq Mannarsinnguaq Noahsen Sermitsiaq.AG-mut oqarpoq.

Paamiormiut aamma Kommuneqarfik Sermersooq Paamiut siunissaat pillugu ernumalersimagaluarput. Suliffinnik annaasaqarnerup kinguneranik inuit illoqarfinnut allanut nutsilernissaat aarleqqutigineqartut ilagaat.

Uuliasiornermut ilinniarfiit
Ilinniartussarsiornerup suliniuteqarfiginerulernissaa ilinniarfiup siunniuppaa.

- Ukiuni kingullerni aningaasaliissutaasartut ikilisinneqarnerisa kingorna nammineq ornigulluta ilinniartuusinnaasunut attaveqarniartarnerput ingerlappiarsimanngilarput. Maanna eqqissilluta sulisinnaalerpugut siunnissamut pilersaarusiorneq ingerlatilerlugu, Mannarsinnguaq Noahsen oqarpoq.

Kommuneqarfik Sermersuumi inuussutissarsiornermut siunnersuisooqatigiit aamma nuannaarutigaat Imarsiornermik Ilinniarfiup Paamiuniiginnartussanngornera.

Inuussutissarsiornermut siunnersuisooqatigiit siulittaasuata Martin Ben Shalmip siunnersuutigaa imaani uuliasiornermi tunngaviusumik ilinniartitaanerit Paamiunut nuunneqarsinnaasut.

- Qilanaaraarput qanoq iliuuseqarsinnaaneq siumullu isigisumik suleqatigiinnissaq tamanna Kommuneqarfik Sermersuumut Nunattalu sinneranut iluaqutaassammat, Martin Ben Shalmi oqarpoq.

Imarsiornermik Ilinniarfik ilinniartut inaannik blokkinik sisamanik pigisaqarpoq maannali marluinnaat atorneqartut ilinniartut ukiumut aallartittartut 30-iinnaanissaannik ilinniarfiup siulersuisuisa aalajangernerisa kingunerisaanik.

- Blokkit matoqqasut marluk atorneqaqqilissanik iluarsaateqqaartariaqarput. Kisianni ineriartornissamut periarfissarpassuaqarpoq, Mannarsinnguaq Noahsen oqarpoq.

Powered by Labrador CMS