Tuttut kisinneqassanngillat
Tugtulissuup avannaani Qoorornarsuarmi ukiuni arlalinni tuttunik takunnittoqartarsimagaluartoq tamaani tuttut kisinneqassanngillat
Tamaaniissimapput. Allaammi assilineqartarsimallutik. Tugtulissuulli avannaani Qoorornarsuarmi tuttoqarsimappat kiseqqissaarneqarnissaat pilersaarutigineqanngilaq.
Taamatut aalisarnermut, piniarnermut nunalerinermullu Naalakkersuisoq Karl Lyberth, Siumut, parteeqammi Jens Immanuelsenip paragraf 37 naapertorlugu apeqqutaanut akissuteqarpoq. Taassuma Qoorornarsuarmi tuttoqarneranik ilisimasat pilersaarutillu ujartorpai.
Tamaani siullermik tuttunik takunnittoqarpoq 2008-mi, taamanikkut 11-it kisinneqarlutik. Tamanna Pinngortitaleriffiup 2010-mi malitseqartippaa sulisuminik takuniaasitsilluni. Taamanikkut amerlanerpaamik arfineq-pingasut kisinneqarput. Tuttoqarneralu qularnanngikkaluartoq imaanngilaq tamanna tuttorpassuaqalersinnaasoq.
2010-mi 2012-imilu helikopterimik nannut amerlassusaannik paasiniaanermi tamanna tuttoqarnersoq arajutsisaanneqarpoq. Angalasarnernili ataasinnguamilluunniit takunnittoqarneq ajorpoq.
- Taamaattumik tamaani tuttoqarneranik misissuinissamik pilersaaruteqanngilagut. Soorunamili tamanna arajutsisaattassavarput, ukioq manna aappaagulu allanik suliaqarluta tamaaniikkaangatta, Karl Lyberth paasissutissiivoq.