Aalisarnermik piniarnermillu ilinniarfik Paamiuniiginnassaaq
Imarsiortutut Ilinniarfiit siunissami avissaarsimassapput nukittorsarneqarlutillu
Imarsiornermi ilinniarfiit Nuummut kattunnissaannik isumassarsiaq kikkunnit tamanit oqallisigineqarsimavoq. Ilinniartuniit borgmesterimut, ilinniagaqartitsinermi naalakkersuisoqarfimmit, Kalaallit Nunaanni Sulisitsisut Peqatigiiffiannit inuinnarnillu aqqusinermiittunit aalisarnermik piniarnermillu ilinniarfiup Paamiunit Nuummut nuunneqarnissaa oqaluuserineqartarsimavoq.
Suut tamarmik misissorneqartarsimapput iluaqutissallu ajoqutissallu tunngavilersuutigineqartarsimallutik, sooq Paamiuni ilinniagaqarfiit assersuutigalugu Nuummut nuunneqassanersut. Maanna kiisami aalajangiisoqarpoq. Pissutsit taamaaginnassapput.
Taamatut allapput Naalakkersuisut, taakkualu siunissami Imarsiornermik Ilinniagaqarfiit aaqqissuussaanerat aalajangiiffigisimavaat. Ilinniagaqarfiit makkua kattunneqassapput:
- Imarsiornermi tunngaviusumik ilinniarfiit
- Naalaganngorniatut ilinniarfiit
- Piniarnermik aalisarnermillu ilinniarfiit
Aalajangiinikkut ilinniagaqarfiit avissimaannarnissaat qulakkeerneqarpoq, aalajangiunneqarmat imarsiornermi tunngaviusumik ilinniagaqarfiit Paamiuni ingerlanneqaannartassasut. Nangitsilluni ilinniarfiit soorlu naalaganngorniatut gradit assigiinngitsut Nuummiissapput, tamannalu pivoq qulakkeerniarlugu imaani inuussutissarsiutinik qanimut peqateqarnissaq. Piniartutut aalisartutullu ilinniagaqarfik suli Uummannami ingerlanneqassaaq. Tamanna peqatigalugu aalajangiunneqarpoq sumiiffiit taakkua pingasut ataatsimoortuussasut ataatsimik forstandereqarlutik.
Aalajangiinermut atatillugu ilinniagaqarnermut, ilageeqarnermut, kulturimut naligiissitaanermullu Naalakkersuisoq Nick Nielsen oqarpoq:
- Naalakkersuisunut pingaaruteqarsimavoq qineqqusaarnermi neriorsuutitta piviusunngortinnissaat. Tamanna peqatigalugu naalaganngorniat ilinniarfiata Nuummut inissinneqarnissaanik siulersuisut inassuteqaataat Naalakkersuisut tusaaniarsimavaat. Ilinniagaqarfiit nunamut tamarmut siammartikkusuppavut, aalajangiinerlu takussutissaavoq Naalakkersuisut oqimaaqatigiisumik ineriartornissaq qulakkeeraat.
Aamma atuaruk: Paamiuni ineriartorneq ersissutigaat
Aamma atuaruk: Ilinniarfiit pisortaat Pallemit sumiginnagaasutut misigisimapput
Aamma atuaruk: Assit: Ilinniarfiup nuunnissaanut akerliussutsimik takutitsineq
Aamma atuaruk: Paamiut: Ilinniarfiup nuunnissaanut akerliussutsimik takutitsineq
Aamma atuaruk: Inuussutissarsiornermi siunnersuisooqatigiit: Paamiunut annaasaq annertooq
Aamma atuaruk: Imarsiornermi Centeri: Nuussinissaq Asiip ajuusaarutigaa
Inuussutissarsiutip pisariaqartitaanik imarsiornermi ilinniagaqartoqarsinnaassaaq.
Imaani inuussutissarsiortut naalaganngorniat ilinniarfiinik qanimut peqateqarnissaanik kissaateqarneq naatsorsuutiginninnerlu Nuummut inissiinissamik aalajangernermut pingaaruteqarsimavoq.
- Aalisarneq inuussutissarsiutitta pingaarnersaraat. Qularutiginngilara imaani inuussutissarsiortunik oqaloqateqarnitsigut, pingaartumillu ilinniagarfiup siulersuisunik oqaloqateqarnitsigut, ineriartorneq qulakkeersinnaagipput, inuussutissarsiutip pisariaqartitaanik tapersiisoq naammassinnittorlu. Nalunngilara imaani inuussutissarsiutit inuussutissarsiutit siuariartorfiusut, assersuutigalugu aatsitassarsiorneq assigalugu. Taamaattumik pi8ffissamut sivisuumut suliassaqartitsiniarneq eqqarsaatigalugu pingaaruteqartorujussuuvoq imaani inuussutissarsiutini suliffissat suli amerlanerusut nunaqavissunit inuttalerneqarnissaat, Nick Nielsen oqarpoq.